Unha imaxe dos Bolechas Os Bolechas, a máis nutrida serie da literatura infantil galega publicada por Edicións A Nosa Terra dende 2000, estase a converter en todo un fenómeno cultural entre os nenos galegos, algo semellante ao que xa aconteceu cos veteranos Mortadelo e Filemón (Edicións B), que este ano cumpren medio século de vida e peripecias varias. Aínda sendo distintas, as dúas sagas comparten espazo de éxito nas baldas das librerías atraendo cada vez a maior número de seguidores, moitos dos cales se confesan lectores das dúas tramas.

O pai dos Bolechas, o debuxante Pepe Carreiro, explica que o éxito dos seus personaxes, os irmáns Carlos, Braulio, Pili, Loli, Sonia, Tatá e o can Chispa, débese, entre outras cousas, ao feito de ser unha familia que ofrece unha continuidade que aos lectores lles aporta unha complicidade cos distintos personaxes. “Adapteime ao público ao que vai dirixido cunha liña clara e doada de asimilar, con cores planas, perspectivas sinxelas e textos fáciles de comprender pero con algunha verba nova, para que os nenos adquiran vocabulario”, explica este autor de éxito que xa leva publicados preto de 200 títulos nas distintas coleccións editadas por A Nosa Terra.

Admirador de Mortadelo e Filemón, cos que confesa ter pasado “grandes momentos” na súa nenez e adolescencia, Carreiro admite algún tipo de influenza indirecta dos personaxes de Ibáñez. A meirande diferenza entre Os Bolechas e Mortadelo e Filemón é o público ao que van dirixidos: mentres que os personaxes de Carreiro abarcan unha franxa de idade que vai dende primeiros lectores até 8 ou 10 anos, os peculiares investigadores da TIA atraen até as súas páxinas a lectores de todas as idades.

Satisfacción

Despois de oito anos no mercado editorial, Pepe Carreiro amósase satisfeito cos seus personaxes. “Estou orgulloso de que os nenos se introduzan na lectura e na lectura en galego cos Bolechas. Os nenos len porque lles gusta, independentemente do idioma, e cos meus libros engánchanse á lectura”, confesa este autor que di que lonxe de adoutrinar, o que busca é que os máis novos se introduzan na lectura.