Redacción . Desde esta semana, Suso Baleato, coordenador do programa de software libre Mancomun.org, escribe un blog sobre temas tecnolóxicos. O de Baleato é o primeiro dunha serie de novos blogs que A Nosa Terra Diario estreará nas próximas semanas.
Suso Baleato é un dos meirandes especialistas en software libre de Galiza. Como coordenador do Centro de Referencia e Servizos de Software Libre, máis coñecido como o programa Mancomun.org, que promove a Consellaría de Industria, está ao tanto das últimas novidades en programación e coñece moi polo miúdo os traballos que se desenvolven en todo o mundo na xeneralización dunha informática útil, accesíbel e gratuíta, que se enriquece co traballo de todos os usuarios e técnicos. O seu blog en A Nosa Terra Diario é unha porta aberta a esa novidades para que os lectores estean ao tanto das vantaxes e novas opcións que poden empregar nos seus ordenadores de xeito cotián. A súa presenza nas nosas páxinas encamíñase no interese que o noso xornal ten nas novas tecnoloxías e, especialmente, nas novas ferramentas de software libre que melloran moito a navegación pola rede, a estabilidade dos sistemas operativos e o uso da nosa lingua en todos os programas informáticos. O de Baleato únese ao blog de Óscar Lorenzo, que segue desde hai meses a actualidade do Celta de Vigo. Ambos sumaranse ás novas propostas que nas próximas semanas irán aparecendo en A Nosa Terra Diario. Visite o blog de Suso Baleato.
Descargar Tarifas