O escrutinio de votos das eleccións xerais nunha mesa electoral do Concello de Valdoviño, na provincia da Coruña, é o único de España que permanece sen pechar un día despois da xornada electoral de onte, debido a que nunha mesa se rexistraron menos papeletas introducidas en urna que votantes figuraban como que exerceran o seu dereito ao sufraxio.

Segundo confirmou o subdelegado do Goberno na Coruña, José Manuel Pose Mesura, unha vez pechada a mesa onde se rexistrou a incidencia, os membros detectaron que había unha diferenza de 50 papeletas menos en urna respecto ás persoas que anotaran nas actas de exercicio de voto.

Os membros da mesa decidiron entón por unanimidade non proceder a contar os máis de 400 votos que si se introduciran na urna e entregaron a documentación ao xuíz. Porén, segundo explicou o subdelegado, ese non é o procedemento correcto, se non que tiñan que realizar o reconto dos votos que había en urna e reflectir a anomalía no parte de incidencias que se remite á xunta electoral, para que este órgano decidise sobre este caso.

A decisión, na xunta electoral

A xunta electoral pode agora decidir que se repitan as eleccións xerais nesa mesa ou contar os votos que había en urna porque "non supón nin unha milésima" no cómputo xeral, sinalou Pose Mesura, para quen a explicación a esta anomalía podería estar en que os membros da mesa se saltaron de liña cando anotaban a persoa que exercía o seu dereito ao sufraxio.

Paralizado no 87,98%

Debido a esta incidencia, o escrutinio de votos en Valdoviño permanece paralizado no 87,98% dende onte pola noite. Neste municipio coruñés hai censadas máis de 6.900 persoas e segundo os datos provisionais do Ministerio do Interior, onte exerceron o seu dereito ao sufraxio 3.771 veciños.

Segundo o balance provisional, este municipio rexistraría unha participación do 69,33%, fronte a unha abstención do 30,67%, pero estes datos non reflicten a incidencia na referida mesa electoral porque alí non se computaron os votos introducidos en urna. Esta incidencia mantén sen pechar o escrutinio definitivo en Galicia o 99,97%, de forma que é a única comunidade que aínda non pechou os seus datos provisionais.

Escrutinio para o mércores

O próximo mércores se iniciará o escrutinio definitivo a partir do reconto dos votos de residentes ausentes e, posteriormente, se procederá á lectura dos resultados das diversas mesas ante os representantes dos partidos, de forma que se abre o prazo de reclamacións.

Non variará resultados

A decisión ao caso de Valdoviño deberá estar adoptada antes da proclamación definitiva de resultados pola circunscrición coruñesa, aínda que a súa incidencia no cómputo xeral desta provincia é insignificante e non podería facer variar ningún tipo de resultado.