Obras de Sercoysa en Salvaterra, que Hernández certificou como rematadas, segundo o PSdeG. PSdeG

O PSdeG segue a súa ofensiva contra o Conselleiro de Medio Ambiente. O deputado socialista Paulo López Vida, presentou unha Proposición non de Lei na que lle reclama á Xunta a suspensión das competencias de contratación do conselleiro de Agustín Hernández.

O mandatario está a ser investigado polo Tribunal Superior de Xustiza de Galicia. Hernández, segundo a denuncia xudicial do PSOE, "certificou no 2006 dende a Deputación de Pontevedra a finalización dunha obra, cando esta apenas estaba iniciada, para que a empresa adxudicataria, da que foi apoderado e director de construción, percibira preto de 400.000 euros".

A empresa beneficiada polo certificado falso é Sercoysa, na que traballou Hernández tras ser director xeral de obras públicas con Feixóo e Fraga e antes de incorporarse á Deputación de Pontevedra de Rafael Louzán.

2,3 millóns do departamento de Hernández á súa ex-empresa

Segundo desvelou ANT, a Xunta do PP leva adxudicados máis de 2,3 millóns á construtora Sercoysa en menos dun ano. Os cinco contratos foron concedidos por departamentos que dependen do propio Hernández.

“As dúbidas sobre posibles incompatibilidades do conselleiro que segue a licitar e adxudicar obras do seu departamento a empresas nas que estivo en nómina son máis que razoables”, argumenta o PSdeG.

O PSOE pide que Facenda asuma as licitacións de Infraestruturas

O deputado Pablo López engade que os feitos son “legalmente constitutivos dun delito de falsidade en documento oficial, cometida por funcionario público” e “tamén poden ser constitutivos dun delito de estafa, dado que por mor da certificación presuntamente falsa se puideron liberar fondos dunha institución pública de cara a unha adxudicataria sen ser esta acredora do pago”.

Mentres o TSXG non se pronuncie, os socialistas demandan que a conselleira de Facenda asuma as licitacións que dependen do político investigado.