Sede do Consello de Europa en Bruxelas

Así o asegurou hoxe o portavoz da plataforma, Carlos Callón, tras entregarlle a unha representante do Secretariado para a Carta, Simone Klinge, un informe "indicando os principais incumprimentos deste tratado por parte do actual Goberno da Xunta", e no que se fai "fincapé" no ensino.

Neste sentido, Carlos Callón recordou que o Consello de Europa realiza cada tres anos un informe de avaliación do cumprimento por parte dos estados da Carta. En 2008, o organismo realizou unha serie de recomendacións que "non só non están sendo tidas en conta, senón que as medidas que eloxiaba o texto, como as galescolas, agora están sendo desmanteladas polo actual Goberno", indicou Callón.

Tras recordarlle á Xunta a súa "obrigación" de "acatar os tratados internacionais", Carlos Callón indicou que as visións das entidades sociais de defensa do galego "sempre foron tidas en conta" polo Comité de Expertos.

O informe “máis crítico”

Paralelamente, considerou que o próximo informe, que o Comité pretende emitir en abril deste ano, será "o máis grave para a lingua galega" e "o máis crítico" coa política lingüística da Xunta.

Entre os puntos que inclúe o informe, Queremos Galego recordan a recomendación do Comité de Expertos de pór en funcionamento un sistema educativo de inmersión en galego, así como a valoración do sistema de galescolas.

No ámbito da xustiza, denunciou a plataforma, "non se tomou ningunha medida para que existan formularios en galego, para que se traduza a lexislación ou para que se estabelezan programas de formación neste idioma", como propuña o organismo europeo; á vez que criticaron un "importante retroceso" da lingua galega na Administración pública.

Entre outros aspectos, Queremos Galego explicoulle ao Comité de Expertos que "non existe ningún plan de acción para evitar os casos en que os traballadores foron obxecto de acoso por falar en galego" e indicou que o Servizo Galego de Saúde non "emprendeu iniciativas de formación ao persoal".