Transcorridos case 12 meses desde o 1 de marzo que supuxo a perda do Goberno, o entón candidato recorda aqueles días como os da "campaña máis sucia da democracia, que ao PP lle funcionou". Tras garantir que está "totalmente superado no anímico, persoal e no político", Quintana rememora que "o máis duro" foron os dous meses logo da "gran decepción electoral", nos que conviviu "co pesar de moita xente que abandonara a súa actividade profesional para contribuír á experiencia de goberno".

Á Galiza de hoxe, o político nacionalista obsérvaa "cos mesmos problemas que en 2009, pero con menos expectativas de solución, porque ten un goberno que abdicou das súas responsabilidades". Fronte a iso, contrapuxo o bipartito, do que considerou que "como xestión de goberno, tivo poucos erros". "Algúns si, pero poucos", aseverou para "negar a maior" de que a acción á fronte do Executivo fose a causa da derrota nas urnas de hai un ano.

"Foi un erro político gravísimo", continuou, e explicou que se debeu a "non saber valorar na súa xusta medida o adversario político, o PP, e centrar demasiado a controversia política entre o BNG e o PSOE", sobre o que entendeu que o PSOE, por ter "máis representatividade" que os nacionalistas tivo "unha responsabilidade doutra índole que o Bloque, que só tiñan un terzo do goberno".

“Froito da nosa debilidade”

"O PP soubo ler isto astutamente, fixo unha campaña demagóxica da crise e tremendamente sucia, e funcionoulle", recoñeceu. "É froito da nosa debilidade política (polo BNG), porque tratamos de cambiar o sistema de poder tradicional e revelouse": "Viron un perigo, foron a por nós e conseguírono", reflexionou.

Pero mirando ao presente, Quintana evidenciou que hai "unha reflexión pendente tanto no Partido Socialista, como no BNG", para volver reconducir as relacións entre ambas as formacións, porque "a alternativa en Galiza, ao PP, é plural necesariamente". "Canto antes se asuma esa realidade, moito mellor para todos, aínda que posibelmente non sexa o que máis nos guste".

Así, o que foi un dos protagonistas do primeiro goberno nacionalista e socialista da Autonomía galega avogou por relanzar os lazos entre as dúas formacións "por unha cuestión de experiencia política, máis que porque cheguen unhas eleccións", e co obxectivo de labrar unha "alternativa ao PP fiábel para a xente".

"Nin teño ningunha intención de regresar á primeira liña política, nin hai ninguén no BNG que mo reclame, polo tanto, non hai ningunha posibilidade a este respecto", asegurou o político nacionalista, quen acalou calquera crítica pola súa presenza pública tras deixar a portavocía do Bloque ao argumentar que el o que único que fai "é cumprir dignamente coas atribucións que o grupo lle conferiu".

Volvendo, así, a aqueles días en que dimitiu por primeira vez a Executiva Nacional do BNG en pleno, Anxo Quintana enmarcou aquela acción, da que foi impulsor por primeira vez na formación frontista, na "responsabilidade" política e censurou "os liderados que se esconden en colectivismos". "Non me gustan e non os comparto", agregou.

Tras a dimisión da dirección, Guillerme Vázquez asumiu o liderado do BNG nunha asemblea extraordinaria. "Demostra que é moi traballador", describiu sobre o novo portavoz, ao que rexeitou dar consello, porque "non o pediu", aínda que se puxo á súa "disposición para o que considere oportuno". Mentres, ao seu ex compañeiro de goberno Emilio Pérez Touriño, mírao "tranquilo no seu papel de observador" e aconselloulle, con "toda honestidade", que sexa "feliz".