Manuel Chaves con Alberte Núñez Feixóo. Pepe Ferrín/AGN

A misiva, á que tivo acceso Europa Press, foi enviada este luns ao mandatario galego, quen respondeu hoxe a Chaves con outra carta, na que lle require que poña "hora e lugar" para a primeira reunión das negociacións e urxe a que sexa "canto antes, se é posíbel esta semana". Feixóo pediu dialogar coa fin de "facilitar a pronta retirada do recurso".

No documento enviado ao máximo responsábel do Goberno galego, o vicepresidente terceiro reiterou a vontade do Executivo estatal de buscar un acordo, unha disposición que, di, xa lle transmitiu "fai uns días en conversación telefónica". Por iso, sinala, invita a Feixóo a "abrir un diálogo entre o Goberno da Xunta e o de España que puidese conducir a ese desexábel acordo".

"Pola miña banda, podo adiantarche a vontade do Goberno do que formo parte de retirar o recurso de inconstitucionalidade no momento mesmo no que se formalice o acordo entre a Xunta e a Administración Xeral do Estado", conclúe a comunicación do ministro.

Chaves informa, así mesmo, na carta do acordo adoptado polo Consello de Ministros o pasado 5 de febreiro de interpor un recurso de inconstitucionalidade contra determinados preceptos da Lei de Caixas, unha decisión fundamentada en "informes xurídicos propios" que entenden que “se produciu unha extralimitación” na competencia que a comunidade galega se outorga "en materia de solvencia e natureza das caixas como entidades de crédito, así como na regulación dos órganos de representación destas".

O Goberno conta tamén, segundo agrega, co ditame favorábel do Consello de Estado, "coincidente cos informes dos servizos xurídicos do Estado".