No canto ao carácter constitutivo que dá a norma galega ao rexistro de altos cargos -os nomeamentos ou cesamentos non terán efecto até que se comunique a inscrición no rexistro-, o Goberno considera que contradí tanto a regulación xurídica do tráfico mercantil como a regulación dos órganos de goberno recollida na lei estatal, pois esta non prevé a alta nesta listaxe como requisito previo para exercer como conselleiro nunha entidade.

Outro dos puntos impugnados é o que se refire á representación das entidades representativas -un 10 por cento da asemblea-. "A inconstitucionalidade prodúcese", argumenta o recurso, porque a lei galega non somete o sector ao "principio básico" de igualdade proporcional á cifra de depósitos entre as diferentes comunidades nas que estean abertas oficinas das caixas.

Así, o documento rexistrado ante o TC responde tamén ao argumento da Xunta a este respecto, pois sinala que aínda que "é certo" que este sector non se considera básico na Lei de Órganos Reitores de Caixas de Aforros (LORCA), "non cabe ningunha dúbida" de que, no caso de que apareza esta representación, "queda suxeita ao principio básico de igualdade proporcional á cifra de depósitos".

O Executivo estatal impugna tamén o precepto galego que estabelece que os membros do consello de administración deberán escollerse de entre os integrantes da asemblea, pois a LORCA permite que entren conselleiros alleos a este segundo órgano se cumpren os requisitos de profesionalidade". Así mesmo, respecto de que unicamente o Parlamento pode ter máis dun representante no consello, reclama que a representación debe facerse a través "dos mesmos grupos e con igual proporción" que na asemblea.

No caso do artigo 32 que sinala que a asemblea tomará as súas decisións por maioría simple, o Goberno ve unha "omisión insalvábel" que non se inclúan neste punto os acordos sobre unha fusión dentro do réxime de quórum cualificado.

Tamén a autorización dos orzamentos de obra social contradí a norma estatal, prosegue o recurso, que sostén que estas son competencias atribuídas aos órganos de goberno das entidades e interpreta este precepto, de novo, como unha "extralimitación" da comunidade. Os mesmos motivos argumenta para impugnar que o Goberno galego deba dar o seu visto e prace previo a investimentos superiores a 500.000 euros en tres anos.

Para rematar, o recurso sinala que a renovación total dos órganos de goberno nun prazo de dous meses -como figura na disposición transitoria primeira- "infrinxe" tamén a LORCA. Admite, neste punto, as teses defendidas pola Xunta de que a norma é "básica" no que se refire á renovación parcial, aínda que esta non ten por que facerse necesariamente a medias.

Neste sentido, refire que na mesma disposición da lei galega se estabelece que, na primeira renovación, seguirán no seu cargo un ano máis os representantes dos empregados e a metade dos impositores, co que a renovación é do 75 por cento. Esta aclaración "non fai desaparecer o vicio de inconstitucionalidade", insiste o Executivo estatal, xa que non é "suficiente" para cualificar de "non radical" o cambio nos membros das asembleas.