Panorámica do hemiciclo galego. Pepe Ferrín/AGN

Foi o portavoz do Grupo Parlamentario do Bloque, Carlos Aymerich, quen puxo o acento en que a libre prestación de servizos "legaliza o dumping" social e, polo tanto, "non se garante que os traballadores galegos" estean suxeitos á lexislación laboral de Galiza.

Neste sentido, instou os grupos a incorporar unha emenda dos nacionalistas cuxo obxecto se basea en "asegurar as condicións mínimas", aínda que iso supuxese "un conflito" coa Unión Europea, porque "merecería" a pena, tras o que lamentou a actitude dos grupos 'popular' e socialista por non recoller esta cuestión, que xa fora rexeitada en trámites parlamentarios anteriores.

De feito, a crítica do deputado do Bloque molestou     o socialista Xosé Manuel Laxe Tuñas, quen subliñou que o PSdeG "non aceptará leccións" sobre a defensa dos dereitos dos traballadores, algo que recalcou ao recordar que o seu partido leva nas súas siglas a condición de "obreiro".

"Respectamos a defensa dos grupos minoritarios (polo BNG), pero ninguén pode pór en dúbida a nosa defensa dos dereitos dos traballadores e non lle imos aceptar leccións", espetou Laxe Tuñas, a quen Aymerich lle revelou que "o verdadeiro debate que latexa detrás da liberación de servizos" son as condicións dos traballadores, que "non se harmonizan" no ámbito europeo.

Pola súa banda, o representante do grupo do PPdeG no debate, Antonio Rodríguez Miranda, tendeu a man a transaccionar a emenda nacionalista incorporando a necesidade de que a defensa das condicións de traballo atendan ás normativas europeas e estatais vixentes.

"Teñen a posibilidade de collela e aprobala, ou votar en contra e quedar en solitario", dirixiuse Rodríguez Miranda ás bancadas nacionalistas, un xesto que non chegou a ser negociado antes dos sufraxios e, polo tanto, tampouco incluído.

Inclusión galego

Durante as súas respectivas intervencións, os deputados dos tres grupos destacaron as melloras que suporá a transposición da normativa para a simplificación de trámites ou en aspectos como os colexios profesionais, así como todos se fixaron na introdución da lingua galega na prestación de servizos.

Así, o nacionalista Carlos Aymerich reivindicou que o texto recolla a obrigación de que os prestadores de servizos se dirixan aos consumidores, de forma oral e escrita, en lingua galega –unha opción transaccionada cos demais grupos.

"Non satisfai, pero é un primeiro paso para a plena aplicabilidade da lingua", manifestou o deputado do Bloque, quen apostaba por recoller a obrigación de "promovela", ademais da de dar garantías para os dereitos dos consumidores. "Pero a transacción é algo positivo", admitiu, respecto dunha "mellora para o galego", en palabras de Laxe Tuñas.

"É a proba evidente de que neste grupo estamos por apoiar a lingua propia á marxe de extremismos", destacou o parlamentario 'popular' na súa quenda de intervención, quen tamén aproveitou para subliñar que os 'populares' aceptaron boa parte das emendas da oposición "para mellorar o texto" e, así, "pór por encima os intereses do país".