Nicolás Sarkozy, presidente de Francia. Philippe Wojazer/Reuters

O primeiro ministro, François Fillon, afirmou que para reforzar a identidade nacional se colocará unha bandeira francesa en cada colexio e unha copia da Declaración do Home e do Cidadán de 1789 en cada clase.

Ademais, reforzarase a educación cívica entre os escolares, modificarase a Xornada de Chamamento de Preparación para a Defensa (que substituíu ao servizo militar en 1998) para que sexa "un verdadeiro lugar de encontro cidadán" e os alumnos de primaria contarán cun 'carné do mozo cidadán'.

En canto aos estranxeiros, Fillon dixo que a intención é reforzar o Contrato de Acollida e Integración –polo que se lles propón aos inmigrantes recentemente chegados un contrato recíproco, civil e social que os une á República– e facer máis solemne o acto polo que os estranxeiros acceden á nacionalidade francesa.

Unha nova comisión

Co fin de facer un seguimento destas medidas, formarase unha comisión integrada por "parlamentarios, intelectuais e, sobre todo, historiadores", que, en torno ao ministro de Inmigración, Eric Besson, se encargarán de profundar o debate, explicou.

"A cuestión da identidade nacional ten vocación de ser debatida a longo prazo de forma serena, natural e non partidista porque non hai nada peor que o silencio", subliñou Fillon.

Críticas da esquerda

A discusión acerca de que é ser francés foi denunciada nun primeiro momento pola esquerda como unha manobra electoralista para seducir os votantes de extrema dereita de cara aos comicios rexionais de marzo. Desde entón, a idea lanzada por Besson xerou críticas até entre as filas da maioría presidencial.

Un dos principais brancos das críticas á iniciativa impulsada polo presidente Nicolas Sarkozy é a páxina web creada por Besson para recoller a opinión dos franceses sobre o tema. En pouco tempo, o sitio viuse colapsado por violentas contribucións, do tipo “Francia converteuse nunha colonia de África de xeito irremediábel”; “Ningún francés pediu ser invadido por estranxeiros”... así como reiteradas reivindicacións do dereito de sangue para obter a nacionalidade ou ataques ao Islam.