José Mª Aznar con Mariano Raxoi e Ana Botella no 'Campus 2009' da FAES. PP

"Hai un partido ao que a corrupción lle gustou bastante durante moitos anos", destacou Peñas en declaracións á canle de televisión Cuatro para criticar que esta formación lle paga ademais "os avogados a varios imputados da trama", en referencia ao ex tesoureiro estatal Luís Bárcenas. "Un partido que quere gobernar sen dicirnos se colleu diñeiro da trama Gürtel ou non", proseguiu o ex edil.

Neste punto, relatou que o empresario Francisco Correa era "o home de superconfianza" en todo o relacionado cos mitins e a imaxe do partido. "Era unha persoa que ía polo mundo sacando peito", indicou Peñas, remarcando que o presunto xefe da trama presumía de que o entón presidente do Goberno José María Aznar "estaba ao seu lado".

"Por que Raxoi non foi ao xulgado?"

"Ía polo mundo dicindo que o facía todo co presidente -afirmou-. Dicir Correa era dicir José María Aznar". Dito isto, cargou contra Mariano Raxoi porque, segundo dixo, xa notaba "algo raro" respecto a Francisco Correa e por iso decidiu "apartalo" de Génova. "Por que non foi ao xulgado como fixen eu?", preguntou, para responder: "Porque tiña que falar mal do seu partido e non quixo".

Deste xeito, denunciou que Mariano Raxoi tiña "pleno coñecemento da trama" liderada por Francisco Correa e criticou que "agora non quere saber nada deste tema".

O ex concelleiro 'popular' de Majadahonda destapou a trama Gürtel e, segundo declarou o pasado outubro ante o xuíz da Audiencia Nacional Baltasar Garzón, gravou as súas conversas con Correa "non por vinganza" contra o PP, senón porque llo debía aos cidadáns e porque debían coñecerse os feitos".