Carlos Callón, presidente d'A Mesa e un dos portavoces de Queremos Galego. Manuel Vilas

En declaracións aos medios tras presentar a ILP no rexistro do Parlamento, Callón confiou en que a mesa da Cámara "tome en consideración" o documento, co fin de comezar "nun mes" a recollida das 15.000 firmas necesarias para que os grupos políticos debatan a iniciativa. Para iso, o portavoz da plataforma vaticinou unha "intensa campaña social" polas diferentes comarcas galegas.

A proposta de Queremos Galego pretende "asegurar os dereitos lingüísticos" que "está botando abaixo" o Executivo autonómico, fundamentalmente desde o ámbito da administración; en función pública e desde o ensino. Así, o texto insta a Xunta a cumprir "o mandato estatutario" de promoción da lingua propia de Galiza –artigo 5– e asumir a Carta Europea das Linguas e o Plan Xeral de Normalización Lingüística –2004.

“Non vai contra ninguén”

Por iso, Callón defendeu que a proposta "non vai contra ninguén", senón que incide "desde a base social" na "defensa do conxunto da cidadanía" e "dos consensos" normativos alcanzados polos diferentes sectores.

Deste xeito, instou os cidadáns "que co corazón na man defenden o bilingüismo" a que apoien as iniciativas recollidas na ILP, tras recordar que "a lingua galega é motivo de unión". En contraposición, denunciou "o proceso de desmantelamento" que, na súa opinión, impulsa a Xunta e reiterou a súa petición aos votantes 'populares' para que "reflexionen se apoiaron a este partido para que ataque a lingua, crispe a cultura e divida a sociedade".

Finalmente, destacou que, "no tempo que leva Feixóo" no Goberno, "non houbo a primeira medida en defensa do idioma" e que, por outra banda, haxa "conselleiros e conselleiras que presumen de non saber" galego.