Os destinatarios destes informes serán tanto os técnicos da consellaría, das cooperativas agrarias e organizacións profesionais e de asesoramento como os propios agricultores e gandeiros.

"Hai entidades que están traballando en sistemas de avisos e alertas que poidan chegar ao agricultor", recordou o titular da Administración agraria galega, quen apuntou que unha das liñas de traballo se centra en realizar eses avisos a través de mensaxes ao teléfono móbil.

A rede de estacións, as case 80 dependentes de Medio Ambiente e as 60 de Medio Rural, permitirá, ademais, ofrecer información agrometeorolóxica personalizada de cada área xeográfica galega até alcanzar ámbitos locais.

O conselleiro de Medio Ambiente, Territorio e Infraestruturas, Agustín Hernández, asegurou que os datos agrometeorolóxicos e relacionados coa conservación da natureza xestionados por Meteogalicia estarán a disposición dos cidadáns a partir do próximo mes.

A subministración desta información, que até a data recollían as estacións de Medio Rural, permitirá un aforro do 50 por cento dos custos do servizo que prestaba a Administración agraria galega e que roldaban os 100.000 euros, como apuntou Juárez. "Os datos non eran todo o correctos que poderían ser", observou para asegurar que, a partir de agora, a rede será "máis ampla" e achegará "máis e mellores datos" a agricultores, gandeiros e silvicultores.

Hernández destacou a coordinación do Goberno galego a través desta iniciativa, así como a optimización de custos e o aforro que repercutirá nunha mellor xestión, da que asegurou que será máis "profesionalizada", cun sistema "rigoroso e viábel". Neste punto, recordou que Meteogalicia é un "referente" na predición meteorolóxica de Galiza e o noroeste peninsular.

Así mesmo, sinalou que se ampliará o grao de información procedente do Parque Nacional das Illas Atlánticas, onde se instalarán hidrófonos para detectar cetáceos; cinco rexistradores ultrasónicos para advertir quirópteros e dous cámaras de fototrampeo para obter información de vertebrados terrestres. Ambas as consellarías coordinarán a información procedente deste espazo natural.

Tamén indicou que na rede de Meteogalicia existen tres boias situadas en Rande, Cortegada e Cíes, ás que se sumarán outras dúas que se situarán na desembocadura do Río Miño e que permitirán detectar a presenza de cetáceos e outras especies diversas.