Alberte Núñez Feixóo, presidente da Xunta. AGN

"Se ten dúbidas lexítimas e de boa fe, sentámonos e vémolas; esa é a nosa folla de ruta", subliñou o mandatario galego na rolda de prensa posterior ao Consello da Xunta, onde matizou que se o que se busca é "bloquear" o futuro de Caixa Galicia e Caixanova, será "responsabilidade" do Goberno de España e dos socialistas galegos, pero el non participará.

Feixóo insistiu en que a Xunta prefire "o diálogo ao conflito e a solvencia e galeguidade ao bloqueo das caixas" antes de recordar que a lei que as regula foi aprobada por "dous terzos" do Parlamento galego polo que un recurso á mesma iría contra a Cámara, non contra el ou o seu Goberno.

Como proba da súa vocación "negociadora", aludiu aos "contactos continuos mantidos" nas últimas semanas, e lamentou que, aínda así, todo apunte a que este seguirá "as directrices de Ferraz" e recorrerá finalmente a lei de caixas. "Seguiremos pedíndolle até o último segundo que non o faga", proclamou respecto diso.

Consultaralle ao BNG

Neste escenario, o presidente mostrouse disposto a negociar co Estado "algunhas cuestións" puntuais da normativa, fundamentalmente de carácter técnico, consultando co BNG calquera posíbel cambio, aínda que advertiu de que non admitirá recortes de "principios" lexislativos que leven ás caixas "a unha situación de precipicio".

"Un galego ten os mesmos dereitos que teñen un andaluz, un catalán ou un vasco", argumentou, a continuación, Núñez Feixóo, quen salientou que Galiza ten "vida intelixente" que sabe tender a man e negociar, pero tamén "ler" as leis aprobadas recentemente noutras autonomías. "E na norma galega non hai ningún precepto que non estea nelas", remarcou para esixir, ao tempo, "que non se castigue, ameace ou bloquee a Galiza".

Para rematar, Alberto Núñez Feixóo evitou profundar nas declaracións realizadas hoxe polo portavoz económico do PP, Cristóbal Montoro, quen asegurou na Cadea SER que a Lei de Caixas estatal teríase que "facer xa" para "despolitizalas", á vez que avogou por "reducir as competencias" das comunidades autónomas en tempos de crise económica.