Xosé Manuel Laxe, deputado do PSdeG. Irene molina/AGN

Tras rexistrar unha interpelación na que defendeu a necesidade de dotar os medios de comunicación públicos dun novo marco lexislativo, o socialista apostou por "preservar" as características de "servizo público" da Radio Galega e a Televisión de Galicia en canto a "calidade" e "defensa" da lingua propia e tamén destacou a importancia de pasar "dunha televisión gobernamental a outra na que se visualice a pluralidade".

A maiores, reivindicou unha mellora nas condicións laborais dos traballadores da Compañía de Radio Televisión de Galicia (CRTVG) e apostou por darlles "estabilidade" co fin de "contribuír" a que os profesionais "poidan desenvolver o seu labor sen presións nin consignas políticas".

Así mesmo, advertiu de que os medios públicos galegos non poden permanecer alleos á "revolución tecnolóxica" que se está levando a cabo e que modifica as formas de relacionarse entre a poboación. "A adaptación aos cambios tecnolóxicos terá que acompañarse dunha modificación legal que cre un novo marco normativo que regule a súa misión de servizo público", concluíu o deputado do PSdeG.

Cambios na Dirección

A última das propostas centrouse no nomeamento da dirección do ente e concretou que o director xeral debe ser elixido por maioría cualificada na Cámara autonómica. Estendeu este requisito ao Consello de Administración, que non terá posibilidade de renovar tras ocupar o cargo durante un período superior ao da lexislatura.

Neste punto, Laxe Tuñas evocou o nomeamento do actual director xeral do ente, Alfonso Sánchez Izquierdo, para incidir en que "é un director de parte, posto a dedo" polo presidente da Xunta, Alberte Núñez Feixóo. Precisamente, censurou que o xefe do Executivo autonómico actuou "como un trileiro" nesta ocasión.

Xestión do bipartito

Para rematar, preguntado por que non se reformou a normativa durante o Goberno bipartito da Xunta, o socialista sentenciou que iso "non é óbice nin impedimento" para dar agora "un paso adiante". "Auga pasada non move muíño", resolveu.

"Hai que aprender do pasado, pero os cidadáns axuizarannos polo presente e polas decisións que tomemos sobre o futuro", esgrimiu, convencido de que se deu "un tempo razoábel" aos actuais dirixentes e de que ao seu grupo lle toque "facer unha avaliación". "Poremos sobre a mesa medidas positivas para Galiza", afirmou.