A conselleira de traballo, Beatriz Mato. AGN

A CIG acusou este mércores a Consellaría de Traballo e Benestar de aproveitarse da “cesión ilegal” de 60 traballadores de Plexus, unha empresa próxima ao PP, para tramitar expedientes da Lei da Dependencia. O Goberno reacciona cun comunicado no que, malia recoñecer a contratación deste número de operarios, asegura que non cometeu ningunha ilegalidade.

60 traballadores para “mellorar o programa informático”?

As versións do sindicato e do Goberno difiren. A CIG destaca que non hai ningún contrato público ou adxudicación de Traballo a Plexus para tal fin, tal e como se pode comprobar efectivamente no DOG e na Plataforma de Contratación.

O Goberno alega que se trata dun “contrato temporal” a través dunha “asistencia técnica informática” urxente e “completamente legal”. Sorprende tal número de traballadores, 60, presentes en varias delegación, polo menos en Vigo e Ourense, cando Traballo insiste en que a súa tarefa é exclusivamente “mellorar o programa informático”.

Denuncias ante a Axencia de Protección de Datos e a Inspección de Traballo

“En ningún caso están realizando outro tipo de funcións que non sexan as relacionadas coa xestión informática de datos e que, por suposto, non teñen que ver nin co tratamento dos expedientes nin co proceso de valoración ou resolución”, alega o comunicado do Goberno. Traballo responde así á denuncia que prepara a CIG ante a Axencia de Protección de Datos e a xa presentada na Inspección de Traballo

O motivo desta contratación sería “a tramitación dos máis de 6.000 expedientes que entrarán antes do primeiro cuadrimestre de 2010 no sistema” de axudas ao Benestar, colapsado dende a súa creación. O Goberno presume que tamén contratou máis “ funcionarios e persoal laboral, máis de 40”. O departamento de Beatriz Mato asegura que a relación con Plexus remata este 15 de febreiro.

A polémica renovación da web do Xacobeo

Non é a primeira contratación presuntamente irregular por parte administracións conservadoras a Plexus. Por exemplo, Plexus tamén fixo a polémica web do Xacobeo que, segundo desvelou ANT e denunciou a oposición no Parlamento, foi actualizada antes de que se resolvese o concurso.

Agasar Cascallar

Antonio Agasar Cascallar, ex-asesor da CRTVG na era Fraga e persoa próxima ao círuclo do ex-conselleiro de Cultura Xesús Pérez Varela, figura como apoderado desta empresa, segundo o Rexistro Mercantil. Varias das súas firmas están relacionadas con contratos presuntamente irregulares de administracións do PP.