A deputada nacionalista Olaia Fernández Davila. XC

Un días despois de que Fernández Davila se reunise co ministro de Educación, Ángel Gabilondo, ao que observou "receptivo" ás peticións dos nacionalistas galegos, ambas as parlamentarias lamentaron que a Xunta se limitase a asinar un documento que responde á "liña electoral do PP" no ámbito estatal e, no seu lugar, "non elaborase unha liña para o documento" propia coas peculiaridades do país.

Así, e tras lamentar o "desleixo de funcións" da consellaría que lidera Xesús Vázquez, reclamáronlle á Xunta que "faga valer as súas competencias" e "estabeleza pactos", de maneira que defenda aspectos como a consecución dun estatuto docente propio para Galiza. "É unha mágoa que o Goberno de Feixóo non leve propostas propias e non trate de mellorar a calidade do ensino en Galiza", reprochou Carme Adán.

Para Olaia Fernández Davila, o Executivo autonómico "non presentou nin se tomou a molestia" de levar un documento coa realidade galega e, en cambio, limitouse a adherirse" ao pactado polas comunidades na que goberna o PP, ante o que se preguntou se está de acordo co Executivo central "recupere competencias educativas", tal e como defenden formacións políticas como UPyD ou até o PP, indicou.

Sen criterios propios

Tamén Adán criticou que o Goberno galego "non levase criterios" propios "nin debatidos" en Galiza para o pacto educativo estatal, no que é "irrenunciábel" a inclusión da realidade plurilingüística ou a defensa dun ensino "público e laica".

Os prazos que se manexan no Congreso é que o pacto educativo poida estar listo nun mes, tal e como manifestou a deputada do BNG, ante o que desexou que o Executivo galego "incida" no documento, aínda que advertiu “que non o fixo" até o de agora, sobre todo cando o Goberno central se reunión coas comunidades autónomas, fronte ao que Adán insistiu en que era "importante" trasladar "un diagnóstico" da realidade educativa galega.

Aspectos do documento

Olaia Fernández Davila, que se reuniu co ministro onte no marco dos contactos co Estado, demandoulle a Gabilondo que "respecte as competencias" autonómicas e "avance no ensino laico", non considerando a relixión como unha materia curricular e impartíndoa fóra do horario lectivo".

A deputada nacionalista transmitiulle ao ministro que "un aspecto fundamental para o BNG é que o pacto defenda o ensino público fronte ás políticas de apoio ao ensino privado e concertada que se están facendo hoxe", así como "o respecto e o recoñecemento do carácter pluricultural e plurilingüístico do Estado español e a súa aplicación no ensino".