Guillerme Vázquez, portavoz nacional do BNG, con responsábeis do Movemento polos Dereitos Civís. AGN

En paralelo a esta reclamación, os membros do MpDC apostaron, no marco dunha reunión co portavoz nacional do Bloque, Guillerme Vázquez, por impulsar unha lei de protección de datos, sobre todo en relación ás cámaras de videovixilancia, acerca das que xa se gañaron "varias sentenzas" por parte da asociación.

Sobre este extremo, o portavoz nacional recalcou que se pasou da "inviolabilidade" dunha carta a situacións como as que se viven hoxe en día nos aeroportos, en que os controis "someten cada día a situacións máis insultantes" aos cidadáns, tras o que indicou que se estudará a proposta realizada.

Ademais desta petición, efectuada hoxe no marco dunha reunión entre o portavoz nacional do Bloque, Guillerme Vázquez, e o MpDC, os portavoces desta entidade expuxeron a necesidade de impulsar por lei o dereito á información dos cidadáns, algo que estudarán os nacionalistas –apuntou o portavoz nacional– posto que o acceso "está limitado en moitos concellos co fin de dificultar o traballo da oposición", a pesar de que constitúe "un dereito inalienábel".

Dereito información

Neste sentido, Renato Nunes, que entregou os informes anuais da asociación desde a súa creación hai oito anos, considerou "fundamental" o dereito ao acceso á información para o "bo funcionamento das institucións e da cidadanía". "A súa carencia leva a unha inseguridade xurídica grande e a que os cidadáns non poden reclamar aquilo que en teoría lles garante a Constitución", subliñou.

Deste xeito, o líder nacionalista recibiu un texto cunha proposta de lei de acceso á información, redactada por esta asociación, e que ten como obxectivo facilitar o traballo de colectivos sociais e organizacións políticas na defensa dos intereses dos cidadáns, para que as institucións faciliten a documentación que se lles require.

Finalmente, o representante de Movemento polos Dereitos Civís propuxo, tamén, a creación dun mecanismo de control dos corpos e forzas de seguridade a través dunha axencia galega de boas prácticas e similar ás existentes en países como o Reino Unido, para "evitar reaccións desproporcionadas".