Protesta da CIG no sector da construción en Vigo. CIG

En rolda de prensa, o secretario comarcal de CIG-Construción en Vigo, Alberto Fernández, asegurou que os contratos que se están subscribindo só contemplan a retribución por horas e que estas están sendo pagadas a 7 euros cando o convenio estabelece que os operarios deben cobrar 9,5 euros.

Ademais, Fernández denunciou que adxudicacións como as do Plan E, que esixen a contratación de empregados locais, están incorporando a estranxeiros, principalmente procedentes de Portugal, que completan xornadas laborais de até 12 horas e aceptan traballar os fins de semana sen percibir ningunha mellora salarial a cambio.

“Présas por rematar as obras”

A CIG atribuíu estas condicións ás "présas" das administracións por terminar as obras e lamentou que primen as datas de inauguración por encima do fomento do emprego, á vez que recordou que o número de parados no sector da construción se elava ás 13.364 persoas na provincia de Pontevedra.

Fernández sinalou que estas prácticas están sendo apoiadas pola patronal e acusou o presidente da Asociación Provincial de Empresarios da Construción (APEC), Anxo Fernández Presas, de "promovelas" e de manter un expediente de regulación de emprego (ERE) na súa empresa, que afecta a 43 persoas, a pesar de que os seus empregados están facendo horas extras.

Así mesmo, o portavoz da Executiva comarcal de CIG-Construción en Vigo, Xulio Vicente, criticou que a patronal obrigue ademais os traballadores a asinar unha cláusula pola cal renuncian á súa indemnización e que a maioría da xente contratada procede do estranxeiro.

Inspeccións

Vicente desvelou que os propios operarios recoñeceron a Inspección de Traballo nunha revisión que estaban cubrindo máis horas das permitidas, con soldos inferiores aos estabelecidos e que cobraban até o 40 por cento do seu soldo "en diñeiro B".

No entanto, apuntou que os inspectores non tramitaron as pertinentes demandas que permitisen denunciar a situación e regular as condicións. Para rematar, alertou do risco de sufrir accidentes laborais ao que se someten os traballadores ao completar xornadas laborais por encima do estipulado.