Xosé Manuel Beiras. AGN

Durante o desenvolvemento da 'Rolda de Rebeldía' en Santiago, na que distintos colectivos debateron sobre o futuro do nacionalismo galego de esquerdas e a súa relación cos movementos sociais, Beiras destacou que o obxectivo da corrente 'irmandiña' é "restaurar a vixencia das regras de xogo -que denominou regras 'de ouro'- da coexistencia interna" do BNG, que fixou en principios tales como democracia interna, pluralidade e asemblearismo. "Estamos traballando dentro do BNG lealmente por un proceso de rexeneración", incidiu.

En resposta aos xornalistas, nun receso da xornada previo á súa intervención na mesa redonda, o ex líder nacionalista apostou por "recuperar o proxecto estratéxico do nacionalismo do último terzo de século". Un proxecto que se plasmou nas bases fundacionais do BNG e que se foi vinculizando nos anos 80 e dándolle cada vez máis forma e máis corpo", aseverou.

Así, defendeu que, durante este período, "todas as illas do arquipélago do nacionalismo" articuláronse "nunha soa organización". "Ese proxecto político está perdido", reprobou Xosé Manuel Beiras, e criticou que "está gardado nun caixón" polo que "non é a referencia" da formación actual. "Sen iso, non se fai avanzar un proceso emancipativo e emancipador do nacionalismo", sentenciou.

"Non fixeron caso"

Neste contexto, e se a devandita emancipación "non é posíbel dentro dunha organización determinada como o BNG", para Beiras, "só é posíbel" desde fóra do BNG. Por este motivo, reivindicou o restabelecemento da interlocución co tecido cívico galego, "que está activo e organizado como movementos sociais".

"O BNG perdeuna", reprochou Beiras, en referencia á interacción coa sociedade galega. "Por moito que nós dixeramos que había que recuperala, non fixeron caso", recalcou.

Deste xeito, xustificou que a corrente que lidera, o Encontro Irmandiño, tome "a iniciativa de intentar recuperala". Con todo, matizou que "o que pase de agora en diante dependerá moito máis de todos estes grupos sociais, movementos e até organizacións políticas que participan nisto -polo sistema político social de Galiza-".

"Nós mesmos non podemos asumir un proceso así, sería absurdo, sería unha especie de paranoia", engadiu, para concluír que "hai un exercicio de modestia indispensábel" que é o que leva a cabo o Encontro Irmandiño.