Carlos Callón, presidente da Mesa pola Normalización Lingüística. Jessica Barcala/AGN

Callón resaltou que o Goberno galego "está queimado, rexeitado e desacreditado" xa que, ao seu xuízo, segue "políticas de desmantelamento en contra dos principais axentes do sector cultural, educativo e da política lingüística". Ademais, A Mesa reclamou "unha rectificación urxente" nas políticas culturais e educativas, que ao seu parecer, "son nefastas".

A Mesa botará a andar, o próximo luns na súa páxina web, unha sección para que os cidadáns poidan mandarlle os seus correos electrónicos á plataforma, tal e como indicou este sábado en rolda de prensa.

Xunto a isto, o presidente da Mesa sinalou como "unha vergoña" contar cun responsábel de cultura que "descoñece e se avergonza da cultura que ten que xestionar e ascender". Nesta liña, Callón subliñou que a sociedade galega "non merece un goberno que insulta", en referencia ás declaracións de Varela que definía á cultura galega como "ensimesmada e acomplexada".

"O presidente da Xunta dixo esta semana que os escritores galegos que critican a política cultural non representan a ninguén, entón quen representa á política cultural do país?", lamentou Callón.

Neste sentido, mostrouse en contra de que o Goberno de Núñez Feixóo siga adiante "cun decretazo de forma inflexíbel" que, segundo remarcou, "conta co apoio unánime da comunidade educativa, agás un par de entidades vinculadas directamente ao Partido Popular".

Así, cualificou como "un diálogo de teatriño" que a consellaría de Educación siga adiante co decreto "sen escoitar a sociedade". "En ningún país democrático do mundo habendo un rexeitamento tan grande cara unha medida se segue adiante, mesmo José María Aznar no seu día chegou a escoitar a sociedade".