Instalacións de Reganosa na ría de Ferrol. Otto/AGN

Este é un dos compromisos pechados durante a reunión que mantiveron o presidente da Xunta, Alberte Núñez Feixóo, e o primeiro ministro portugués, José Sócrates, no pazo de Sao Bento da cidade lisboeta.

En rolda de prensa tras departir co dirixente portugués, o xefe do Executivo autonómico explicou a formulación de conectar a planta de gas situada en Mugardos para transportar enerxía até o país veciño, un proxecto que se estudará nunha primeira reunión cos responsábeis dos departamentos de Industria e que constitúe a transferencia dunha "infraestrutura clave".

"Está a vontade de chegar a conectar o gas" entre ambas as dúas rexións, manifestou o dirixente autonómico tras declinar ofrecer máis detalles do compromiso, posto que aínda non están estabelecidos.

Protocolo do AVE

Sen deixar o ámbito das infraestruturas, un dos asuntos que marcou a axenda do mandatario autonómico, na que foi a súa segunda visita a Portugal tras visitar Porto o pasado mes de xullo, Feixóo trasladoulle ao primeiro ministro portugués o seu desexo de que asine xunto ao Goberno español un protocolo para poñerlle data ao "inicio" das obras da alta velocidade entre Vigo e Porto e "concretar detalladamente como chegar" ao ano 2015, no que está comprometida esta infraestrutura.

A petición prodúcese despois de que o ministro de Fomento, Xosé Blanco, admitise, durante unha visita á capital lusa o pasado mes de novembro, que "en ningún caso" sería posíbel contar con ese tramo de liña de alta velocidade antes do 2015, cando a data varias veces confirmada polos gobernos de ambos os dous países era 2013, polos cambios na saída sur entre a estación viguesa e O Porriño.

Para o presidente da Xunta, que destacou o "compromiso" de Sócrates coa alta velocidade, é necesario estabelecer "un compromiso de inicio" para as obras da rede ferroviaria que unirá ambos os dous países. "É necesario que Galiza e o Norte de Portugal saiban esas datas", proclamou, e sentenciou: "Nada que non se inicie pode estar rematado".

Co obxectivo de dar un impulso a esta petición, o propio Feixóo comunicaralle este desexo ao ministro de Fomento na reunión que ambos os dous manterán o próximo luns en Madrid e que se corresponde coa comisión de seguimento das obras da AVE, tras o compromiso asinado entre Xunta e Estado no mes de xullo e plasmado no coñecido como 'Pacto do Obradoiro'.

Outras infraestruturas

A maiores, o presidente da Xunta e o primeiro ministro portugués tamén abordaron a necesidade de conectar a plataforma loxística industrial Salvaterra-As Neves coa fronteira portuguesa, así como unir a Ponte da Amizade, en Goián, coa autovía da costa portuguesa.