Roberto Mera, Carlos Aymerich, Xosé Manuel Beiras e Francisco Jorquera no Consello Nacional. AGN

Tras realizar un chamamento aos movementos sociais e á cidadanía en xeral para tender pontes e "reconstruír o nacionalismo de esquerdas", a corrente liderada polo ex portavoz nacional do BNG Xosé Manuel Beiras, o Encontro Irmandiño –integrada no Consello Nacional– propón discutir se a cidadanía ve "operativo" organizarse nun partido clásico.

Co obxectivo de que o sábado se produza un "gran debate" en Galiza no marco do camiño fixado para a "reformulación do proxecto político de esquerdas" que esta corrente se marcou e que denomina 'Rolda de Rebeldía', os organizadores presentaron en rolda de prensa o programa definitivo deste encontro, no que o líder da UPG, Francisco Rodríguez, non participará finalmente tras rexeitar a invitación.

O obxectivo das xornadas radica, deste xeito, en "dar resposta práctica á crise de credibilidade e funcionamento efectivo dos partidos e a esquerda clásica". Ademais, o foro, que se programou aberto á participación e achegas de toda a cidadanía, expúxose como unha reflexión ao redor da esquerda "homoxénea", tal e como explicou a Europa Press un dos organizadores, Manoel Santos, quen recalcou que non se trata dun debate interno do Bloque Nacionalista Galego –no que se integra unha gran parte dos participantes–.

Entre as cuestións que se abordarán atópase a reflexión sobre se se debe construír un novo referente-suxeito político-social; como crear canles de comunicación, participación e irmandade de esquerdas; ou que mecanismos e accións se deben emprender para profundar na creación de masas críticas que esixan un cambio radical no modelo de sociedade partindo da realidade galega.

Ao finalizar a tarde do sábado, terá lugar un foro de discusión sobre as achegas que se realicen ao longo da xornada no que está previsto que participen o ex portavoz nacional do BNG e membro do Encontro Irmandiño, Xosé Manuel Beiras; e o portavoz parlamentario do BNG e líder de MáisBNG, Carlos Aymerich.

Nesta mesma parte está previsto que tamén participen membros de formacións como o propio Movemento Galego ao Socialismo, Movemento pola Base, Causa Galiza, Esquerda Unida ou o Partido Comunista do Povo Galego (PCPG).