Presentación do Plan de Ordenación do Litoral. AGN

“Feixóo debería prorrogar a moratoria dos 500 metros estabelecida na Lei de Medidas Urxentes –impulsada pola Consellaría de Vivenda do bipartito– que vence en maio”, afirma Adega nun comunicado. E é que o colectivo asegura que non se cumpren as premisas que xustifican esta medida cautelar: “que os concellos costeiros teñan os seus PXOMs adaptados á Lei do Solo de 2002 –só Vigo, A Pobra do Caramiñal e Laxe fixeron os deberes– ou que a Xunta aprobe o Plano do Litoral”.

Adega sinala que calquera outra decisión, como "levantamentos parciais" en determinados concellos sen ter aprobada a norma “non sería máis que a continuación do ti vai facendo" e reinstauraría a “discrecionalidade, o amiguismo e a corrupción”, xa denunciados polo Parlamento Europeo no seu Informe Auken.

Directrices de Ordenación, paralizadas

Segundo a asociación, o Goberno de Feixóo debería de completar e tramitar as Directrices de Ordenación do Territorio (DOT), que desde a chegada do PP á Xunta fican bloqueadas.

Pola outra banda, Adega ve fundamental coñecer en que medida Plan de Ordenación do Litoral vai condicionar o desenvolvemento de proxectos sectoriais en marcha, caso do Plano Acuícola –que ocupará espazos que están sendo "ordenados" no POL, e que pode condicionar negativamente o desenvolvemento deste. O mesmo acontece co Plano de Portos Deportivos, co Plano Move de Estradas ou co Plano Eólico.

Planos sectoriais

Neste sentido, os ecoloxistas entenden que estes planos sectoriais deben supeditarse ao Plan de Ordenación do Litoral e non ao contrario. “Mais de seguir o seu camiño, piscifatorías, pantaláns, viadutos como o de Noia e muíños acabarán baleirando de contido os pomposos obxectivos do Plano do Litoral presentados por Feixóo”.

Para Adega, este Plan de Ordenación do Litoral debería tamén ter en conta que os 500 metros non son un límite superior senón “un punto de partida”. Así aconteceu en Portugal e mesmo en Asturias, que consagrou esta franxa de protección no seu plano. Un levantamento total ou parcial da lei dos 500 metros mentres se tramita o Plano do Litoral “sería inxusto (para os concellos que cumpriron), xeraría inseguridade xurídica e perpetuaría o clientelismo, a política de feitos consumados e a corrupción endémica denunciada dende Europa.