Traballadores de Mancomun, representantes dos grupos de voluntarios a prol do software libre en Galiza canda a ex-directora xeral da Sociedade da Información, Helena Veiguela, nunha xuntanza en 2009. caloto.net

A información detallaba un concurso polo que unha empresa privada creará unha oficina para realizar o labor que co bipartito facían técnicos contratados mediante concurso público no CESGA, ente tamén público. Uns especialistas que, na súa maioría, xa foron despedidos.

“Mancomún.org é simplemente un portal na internet, xa que –na pasada lexislatura– nunca chegou a crearse un centro de iniciativas de Software Libre”, indican portavoces do Goberno conservador a este diario.

Sen guía co bipartito

O Executivo asegura que co bipartito as iniciativas a prol do software libre estaban “illadas e sen a guía dunhas liñas estratéxicas”. Porén, o PEGSI, o plan director de novas tecnoloxías co anterior Goberno, marcaba unha serie de prioridades para o software libre en Galiza. Ademais, Mancomun.org dispuña dun coordinador, Suso Baleato, responsábel de organizar o traballo.

Fronte a presunta descoordinación co bipartito, a Xunta do PP argumenta que centralizou na Fundación para o Fomento da Calidade Industrial todo o referido ao software libre.

Dúas persoas na Fundación, o resto na Oficina privatizada

Con todo, na propia resposta remitida a ANT a Xunta indica que en toda a Fundación só hai dúas persoas adicadas de xeito prioritario ao software libre. Segundo a versión do Executivo, estes dous especialistas encargaranse de coordinar a colaboración con universidades, grupos de voluntarios e administración.

A Oficina Técnica que levará unha empresa terá, segundo a Xunta, unicamente a funcións de apoio á Fundación. Polo apoio a empresa cobrará até un máximo de 171.000 euros este ano.

En todo caso, voceiros do Executivo destacan que o software libre é clave para “evitar a fenda dixital e facer un uso máis eficiente dos recursos públicos”. Por iso insisten en que o PP cumplirá a súa promesa electoral de impulsar os programas abertos.