Cogomelo único no seu xénero, coñecido popularmente como "Trompeta dos mortos", xa que presenta un aspecto en forma de funil moi peculiar e coloración escura. Cientificamente recibe o nome de Craterellus cornucopioides.Recollido na bisbarra ourensá de Celanova nesta pasada fin de semana de xaneiro, soportando xeadas e fríos.

É abundante en toda Galicia e moi apreciado en cociñas de medio mundo, tratándose dun excelente comestible, ao que non lle fai xustiza o nome popular referido. En distintas zonas recibe tamén o nome popular de “Cantarela moura”. Está incluído dentro dos cogomelos medicinais polas súas propiedades hipoglucemiantes.

Trátase dun cogomelo de 5 a 10 cm de altura e de 2 a 6 cm de diámetro de sombreiro. Ten forma de trompeta, cunha cavidade central que chega ata o fondo do pé. A beira é ondulada e afinada. A tonalidade é variable, dende un gris ou pardo, ata case negro, en función da auga que reciba.

A parte correspondente ás lamelas, que non son tal, senón himenio, é primeiro lisa e vai engurrándose lonxitudinalmente, de cor gris ou parda. A medida que madura vólvese máis clara polas esporas.

O pé está unido ao sombreiro e forma en ocasións un todo. Coa base atenuada, está oco, da mesma tonalidade que o resto do cogomelo.

A carne é escasa e elástica, moi delgada e firme, de cor gris ou negra. Bo olor e sabor a especias.

Aparece en bosques de frondosas, carballeiras, faias e castiñeiros con terreos húmidos. En zonas onde aparece, faino en grupos moi numerosos, formando ramalletes negros dignos de ver. Na zona de Cartelle (Ourense), crece todos os anos baixo bosque mixto en grandes cantidades.

Excelente comestible. Trátase dun cogomelo que pola pouca carne que ten aprovéitase para desecar e moer como especia e, posteriormente, empregar en distintos pratos. Aguanta as xeadas e podemos atopalo incluso en xaneiro. Cotízase caro. Existen diversas receitas na bibliografía culinaria e micolóxica sobre este cogomelo, acompañando a un bacallao ou a unha vieira ou formando parte dun revolto de cogomelos de tempada.

http://www.facebook.com/?ref=home#!/pages/Setas-de-Galicia/303859849330?ref=mf