Malia que a organización e centrais sindicais cifran no 90 por cento o seguimento da folga, a Xunta resaltou que a incidencia se situou por baixo do 50 por cento, segundo os datos provisionais facilitados a Educación polas súas xefaturas provinciais até as 12h00 .

En datos posteriores o Goberno dixo que "en Ourense, co 100% dos colexios escrutados, o 44% do profesorado seguiu o paro; en A Coruña, co 70% dos centros escrutados, secundaron á folga o 47 %; en Pontevedra, co 70% escrutado, un 50% foi á folga; e, en Lugo, co 90 % escrutado, participaron o 35%". A administración presume que ningún profesor da privada foi á folga.

Deste xeito, a Administración educativa explicou que o dato, que se refire só aos centros públicos, "indica que a maioría absoluta dos profesores acudiron con normalidade a clase neste día de folga preventiva convocada e secundada por algúns sindicatos".

Neste sentido, Educación resaltou que "a totalidade dos centros educativos" abriron as súas portas e impartiron "maioritariamente" as clases "como nun día normal".

A consellaría concretou que onde a folga foi seguida, os escolares "foron igualmente atendidos" polos servizos mínimos establecidos en cada centro. Ademais, puntualizou que o transporte e os comedores escolares "tamén funcionaron con total normalidade".

“Cantos extremistas, canta xente ensimesmada (...), cantos viñestes forzados, cantos coacionástedes aos vosos compañeiros para vires?”.

Así comezou a alocución final da protesta o presidente da Mesa pola Normalización Lingüística. Carlos Callón ironizaba sobre as acusacións do PP , sobre supostas ameazas de persoas de Queremos Galegos para forzar aos profesores a facer folga.

Callón advertiulle a Xunta que a Plataforma chamará a “desobediencia civil” se non rectifica. O responsábel da maior organización a prol do galego lembroulle ao Executivo que non hai ningún colectivo a prol do decretazo, salvo os directamente vinculados aos conservadores.

Catro dos cinco sindicatos máis relevantes no ensino

Esta é a terceira gran manifestación contra a política lingüística de Alberto Nuñez Feixóo. Todas elas foron un éxito, tanto no número de participantes como na pluralidade das organizacións que a respaldaron.

E é que, ademais dos nacionalistas CIG e STEG, tamén os sindicatos Comisións Obreiras (próximo a Esquerda Unida), UXT  (próximo ao PSdeG) e os anarquistas da CNT sumáronse á folga. A ANPE (próximo ao PP) non se sumou á folga, pero tamén critica o Decreto.

Subtítulos para preescolares

Callón argumentou que en todas as autonomías con lingua propia hai cursos con máis aulas na lingua autonómica que en español. Isto sucede mesmo en Valencia, gobernada polo PP. Trátase dunha discriminación positiva que está avalada en numerosas sentencias do Tribunal Constitucional.

O líder da Mesa tirou dos Telettubies a modo de exemplo. Tras a vitoria conservadora, a CRTVG deixounos de emitir en galego. Segundo Callón, a televisión pública do país é a única do mundo que os emite en inglés subtitulados, malia estar feitos para nenos que aínda non saben ler.

Craig Patterson, o máis aplaudido

Pola súa banda, Anxo Louzao, secretario nacional de CIG-Ensino, o sindicato maioritario no ensino público galego, pediu ao presidente da Xunta, Alberte Núñez Feixóo, unha reflexión e a retirada das bases do decreto porque, na súa opinión, o texto actual non garante que o alumnado teña competencias en galego”.

Fran Rei, voceiro da Plataforma Queremos Galego, animou dende o Estrado ao público a pedir a dimisión do Conselleiro de Educación. O máis aplaudido foi Craig Patterson, presidente da Asociación Internacional de Estudos Galegos (AIEG), que denunciou que os profesores de inglés non teñen recursos abondos neste intre para mellorar o ensino desta lingua. Patterson tamén lembrou que a Xunta reduciu o número de profesores nas Escolas Oficiais de Idiomas.

A protesta foi animada por Xosé Lois O Carrabouxo e utilizou como imaxe os debuxos Os Bolechas de Pepe Carreiro, ambos dous debuxantes colaboradores de A Nosa Terra.