Ademais de poder violar o Estatuto de Autonomía, a Lei de Normalización Lingüística, o Plan Xeral de Normalización Lingüística e a Carta Europea de Lingua Minoritarias, o decreto que propón o PP pode ser inconstitucional. Así llo advertiron onte a Feixóo xuristas galegos. Baseándose en sentenzas do Tribunal Constitucional e mesmo do Supremo, avogados e xuíces proban que os pais só teñen dereito a decidir sobre o ensino moral e relixioso, pero nunca sobre a lingua.

A falacia da imposición non lle está a dar os resultados esperados a Feixóo, que fica só na loita contra o galego. A meirande parte da comunidade educativa, e os partidos da oposición, ademais de todas as organizacións que abrangue a plataforma Queremos Galego desbotan as bases do decreto. Ao respaldo da CIG-Ensino –sindicato maioritario no sector– tanto ao paro como á manifestación sumáronse a STEG e, máis tarde, FETE-UGT e CC OO. Ademais, a ANPE –afín ao PP– rexeitou o rascuño.

Tamén se posicionaron en contra colectivos como Nova Escola Galega, a Asociación Socio-Pedagóxica Galega, a Asociación de Pegagogos de Galicia ou a Federación de Centros Públicos. Cómpre sumar o apoio de entidades xuvenís. Os Comités, o Sindicato de Estudantes, Iesga, Agir, Galiza Nova, Xuventudes Socialistas, Foro da Mocidade, Esquerda Unida Mocidade ou a Mocidade pola Normalización Lingüística desbotan a proposta do PP, ao igual que formacións políticas como o BNG, o PsdeG, Terra Galega, a FPG ou Esquerda Unida.

A Coordinadora Galega de Equipas de Normalización Lingüística, a Coordinadora Traballadoras/es de Normalización Lingüística (CTNL), a Asociación de Escritores en Lingua Galega (AELG), a Asociación Internacional de Estudos Galegos, Galiza Non se Vende ou Irimia son outros colectivos que censuran a política lingüística do PP.

Tamén desbotan a proposta de decreto a Mesa pola Normalización Lingüística, Prolingua, Galego, Patrimonio da Humanidade e Galego Sempre Máis. Feixóo nin sequera conta co aprobado de entidades afíns, como a Mesa por la Libertad Lingüística ou Galicia Bilingüe, que reclamaron máis desgaleguización no ensino.

Con todo, a maior decepción para o Executivo de Feixóo veu do contundente informe publicado esta semana pola Real Academia Galega (RAG). Prevese que o Consello da Cultura Galega (CCG) –que xa adiantou o seu rexeitamento ao borrador– camiñe na mesma dirección. Mesmo as tres universidades adoptaron unha postura común na que piden a modificación das bases do decreto. Ademais, persoal docente, laboral e investigador da Universidade da Coruña (UdC) apoia a folga contra o borrador.