Os catro socios fundadores de Imaxin Software

Cada día Opentrad, o tradutor automático que axudou a desenvolver, recibe máis de 26.000 visitas. Usalo é gratis –e melloralo tamén, pois é software libre– pero Imaxin cobra por adaptalo.

“O negocio está na personalización” explica Diego Vázquez, director de Mercadotecnia. Por exemplo, se ANT quixera publicar o seu portal automaticamente en inglés, Imaxin cobraríalle por introducir o tradutor no xestor do diario e por incorporar termos xornalísticos.

Realidade aumentada e videoxogos

Opentrad facilita traducir entre galego, castelán, inglés e portugués. Existen outras combinacións nun total de 20 idiomas; incluídos francés, euskera, catalán e mesmo esperanto. Até 14 pares de linguas que se traducen con gran calidade. É produto da colaboración entre as universidades de Vigo, País Vasco, Alacante, Politécnica de Cataluña e a propia empresa Imaxin, Elhuyar (Euskadi), Eleka (Euskadi) e Prompsit (Alacante).

Con todo, as 24 persoas que comen de Imaxin non viven só de Opentrad. Traballan tamén en multimedia, con videoxogos educativos ou a chamada “realidade aumentada”, que engade datos informáticos a imaxes da contorna (fotografías do móbil, por exemplo). Imaxin tamén fai portais e programas, tarefas coas que catro enxeñeiros de informática comezaron en 1997.

Competir nalgo máis que no salario

Unha delas é Luz Castro, orgullosa de lograr o pioneiro galardón ao Mellor Ambiente Laboral que concedeu a patronal da Internet galega, EGANET, este mes en Santiago. “Ter xente implicada coa empresa é unha sorte e hai que tratala con cariño, nas empresas tecnolóxicas o que crea valor é o coñecemento das persoas, a súa innovación”, explica a responsábel de recursos humanos.

Algunha das melloras de Imaxin son, segundo Castro, horario flexíbel, cadaquén escolle o tempo para xantar; xornada reducida no verán; facilidades para os que teñen nenos; cociña na oficina; formación gratis impartida tanto por expertos como por compañeiros.

“Os traballadores están contentos pero Imaxin tamén, é unha forma poder competir con outras empresas, que ao mellor lles ofrecen máis salario pero non unha calidade laboral tan boa”, razoa Castro.