Marcas blancas no supermercado. Paco Vilabarros

Así o reflicten os datos feitos públicos hoxe polo Instituto Nacional de Estadística (INE), que recollen que o IPC permaneceu invariábel en decembro en termos intermensuais, tanto en Galiza coma no conxunto do Estado.

Na evolución por capítulos, os grupos que tiveron un comportamento menos inflacionista en decembro foron ‘Vestido e calzado’ (-1,2 por cento), ‘Transporte’ onde os prezos decreceron un -0,5 por cento e ‘Medicina’ (-0,1 por cento). Por outra banda, o grupo cunha maior suba dos prezos foi o de ‘Ocio e cultura’ (1,1 por cento).

Na evolución interanual, os grupos que rexistraron unha maior caída do IPC foron ‘Vestido e calzado’ (-0,9 por cento); ‘Medicina’ (-0,7 por cento), ‘Ocio e cultura’ (-0,6 por cento) e ‘Comunicacións’ onde os prezos decreceron un -0,3 por cento. Pola contra, os grupos que presentan unha maior suba son ‘Bebidas alcohólicas e tabaco’ (11,3 por cento); ‘Transporte’ (4,1 por cento) e ‘Ensino’ (2,6 por cento).

Índices provinciais

En relación cos índices provinciais, as únicas provincias que mostran unha baixada dos prezos en termos intermensuais son Ourense e Pontevedra, onde decreceron en decembro un –0,3 por cento e un –0,1 por cento respectivamente. No que a variación interanual se refire, todas as provincias viron incrementados os prezos, sendo menos acusada a subida en Ourense (0,5 por cento).

Galiza, entre as autonomías co IPC máis alto

O avance dos prezos no 2009 sitúa a Galiza entre as cinco comunidades autónomas que experimentaron as taxas máis elevadas de inflación, tras Catalunya ( 1,2 por cento), Euskadi ( 1,0 por cento), Cantabria ( 1,0 por cento) e Madrid ( 0,9 por cento).

No conxunto do Estado, o IPC estancouse no mes decembro e a taxa interanual pechou 2009 no 0,8 por cento, a cifra máis baixa que se anotou ao peche dun exercicio desde 1962, primeiro o ano do que se dispón datos. Desta forma, a inflación pechou no seu mínimo histórico dun mes de decembro un ano no que chegou a rexistrar oito meses consecutivos de descensos entre marzo e xullo, cando logrou tocar chan ao rexistrar unha caída do 1,4 por cento.