Ilustración de David Rubín

A actividade subvencionada aspira a contribuír á normalización da lingua galega e estabelece que as accións de difusión, publicidade e comunicación da actividade subvencionada desenvolveranse en galego.

Cun orzamento total de 30.000 euros a Consellaría de Cultura quere promover a creación de obras extensas de cómic en galego en calquera xénero para que os creativos poidan abordar proxectos creativos ambiciosos que polas súas características o mercado actual non consegue promover.

As bases das subvencións, que terán un máximo de 6.000 euros por beneficiario, serán publicadas nos próximos días no Diario Oficial de Galicia (DOG) e os interesados terán o prazo dun mes para presentar a solicitude contado a partir do día seguinte da publicación da orde no DOG.

Unha das esixencias destas axudas é que o proxecto deberá ser executado no prazo de doce meses dende a data da comunicación da concesión da axuda e as actividades obxecto de axuda serán a elaboración do guión do proxecto, os gastos de ilustración e os de edición.

Exposicións itinerantes

De xeito paralelo o departamento de Cultura manterá a itinerancia das exposicións Viñetas descubertas-Certames galegos 200-2008 e Miña Terra Galega polas catro provincias galegas para achegar a todos os públicos estas mostras que supoñen unha escolma do mellor do cómic galego dos últimos anos e que xa tiveron unha boa acollida na última edición do Salón do Cómic de Barcelona e nas Xornadas de Banda Deseñada de Ourense.

As datas e os concellos confirmados para o primeiro cuatrimestre do ano son: Bóveda do 4 ao 18 de xaneiro; Verín do 18 ao 30 de xaneiro; Monforte do 1 ao 15 de febreiro; Celanova do 15 ao 28 de febreiro; Boiro do 1 ao 15 de marzo; Ribadumia do 15 ao 30 de marzo; e O Rosal do 19 ao 30 de abril.