Bieito Lobeira, deputado do BNG. Jessica Barcala/AGN

O conselleiro de Presidencia dixo que o BNG obrigou incluso a ir aos partidos da selección...

O PP está a utilizar unha mentira monumental de xeito compulsivo. Calquera tipo de defensa que un faga do propio, ben sexa a lingua, ben sexa os nosos símbolos, como no caso das seleccións galegas, faise a través da imposición e da obriga. E todo o que signifique desgaleguización e renuncia ao propio, pois é sinónimo de liberdade. Esa é unha ecuación perversa...

Pode ser perverso pero funciona, polo menos a nivel de fixar sobre que falan os medios...

A maioría dos medios, agás honrosas excepcións, manteñen esas teses. Son medios de comunicación perfectamente subsidiados dende o poder político, de xeito millonario ademais, que son quen de modificar o seu discurso en función do que lles manda o PP. Isto ten resultados terroríficos, pero afortunadamente hai unha parte da sociedade que non cre as mentiras.

Necesitaría o BNG moderar as formas do seu discurso para paliar a falacia da imposición?

Eu son dos que cre que o nacionalismo debe ser mesmo máis incisivo. En Galiza non temos bilingüismo nin temos que defender o bilingüismo, o que hai é un proceso de substitución dunha lingua por outra. Ou lle facemos fronte con todas as consecuencias na mobilización social ou estes señores van ir gañando batallas. O nacionalismo debe manter eses principios, porque se non o facemos nós non o vai facer ninguén.

Coñeceu o BNG o borrador de Decreto do Galego nas aulas antes da súa presentación?

Non se puxeron en contacto para negociar nada, a diferencia do que pasou na lexislatura pasada, na que houbo interlocución cos grupos parlamentarios e a comunidade educativa.

A Xunta di que aposta por tres idiomas...

Hai a intención de maquillar a realidade cun suposto trilingüismo, que é irreal porque a docencia non está en condicións de impartir aulas en inglés. Todo isto é un intento de reducir dun xeito estético a presenza do galego e de provocar que sexa entendido socialmente como un idioma inútil, un dialecto que non vale nin para o ensino, nin para a administración, nin para nada. Iso si, baixo un argumento supostamente progresista, que é a introdución do inglés.

Negociará o BNG para recuperar ese consenso como reclama Feixóo?

O consenso previo non era o Decreto de 1995 de Fraga, un texto ademais incumprido, que establecía un 33% de galego fóra das troncais... Para nós o consenso dáse en 2004 e foi de mínimos, aínda que para o PP fose de máximos. Trátase do Plan de Normalización Lingüística cun mínimo do 50%, algo que tampouco é a lexislación máis avanzada do Estado Español. Todo o que baixe de aí, para nós é innegociábel.

Non cre que o PSdeG si negociará por debaixo da porcentaxe vixente?

Tentaremos que a oposición teña unha fronte común, iso é bo para o galego. Pero somos conscientes de que o PSdeG non é o Partido Socialista de Cataluña. Agás persoas concretas, é unha sucursal das teses máis xacobinas do PSOE estatal. Por exemplo, a toponimia na Coruña ou o feito de que algúns deles fixeron valer tamén a tese da imposición. O PSOE móvese en termos puramente electorais. Decatáronse de que a lingua desatou unha gran resposta social polo que conxunturalmente apóiana, mais non por convicción.

Que lle parece que parlamentarios do PP como Pedro Arias usen o español no Hórreo?

O único caso antes era o de Castelao Bragaña (PP), que viña da emigración e aínda así lía primeiro en galego e na réplica pasábase ás veces ao español; pero non con esa intencionalidade política calculada do PP actual. Queren demostrar que renegan do galego mesmo en termos simbólicos. Na Cámara estabamos acostumados a un comportamento de mínimos, que usaran o galego aínda que fóra falasen español. Agora non o fan porque prefiren a palmada dos seus amos de Madrid, os sectores máis reaccionarios, antigalegos e xenófobos do PP; antes de presentaranse como defensores do seu.

Tamén é voceiro de pesca. Que pasou co porto de Massó en Cangas?

Moitas veces atopámonos coa política de feitos consumados. Por exemplo, o Porto de Marín provocou danos irreparábeis sobre os bancos marisqueiros... Agora hai 300.000 m2 de aterrado que segundo sentenza, firme e non recorríbel, hai que retornar á situación anterior; o que é, como mínimo, complexo tecnicamente. É produto da política do PP de tirar para adiante, de actuar en defensa dos intereses empresariais. Esa tamén é a política que utilizan en Cangas, onde a Autoridade Portuaria de Vigo de Corina Porro (PP), acaba de renovarlle a concesión das obras. Nós polo menos temos a conciencia tranquila. O BNG foi a única forza que se opuxo no seu día ao Porto de Marín e aos depósitos do Ferrazo en Vilagarcía...

Pero en Cangas o concello está encabezado polo Bloque...

Fronte a intoxicación, que nos consta que existe, o Concello fixo o que tiña que facer, mesmo forzando a legalidade, con sinais de tráfico que impiden que as obras se fagan por terra. Lamentabelmente a lámina de mar, guste ou non, compételle a Autoridade Portuaria.

Despois da apertada Asemblea deste ano, o BNG logrou manter un discurso único cara fóra?

Na situación que padecemos ten que prevalecer a unidade de acción do nacionalismo. Calquera proxecto nacionalista é viábel só en termos de cohesión, respectando a pluralidade ideolóxica. O nacionalismo é o que é en Galiza, pintamos o que pintamos socialmente, que non é algo menor, pero enfrontámonos a tempos moi duros e haino que facer unidos, senón ao país e ao BNG espéralle un futuro difícil.

Debería haber unha nova Asemblea este ano?

Son moi respectuoso coas decisións internas e defendo ese mal chamado hermetismo. A quen me debo eu é a militancia, moi por riba da miña opinión persoal.