Rosa Aneiros converteuse na autora "pichichi" do ano ao gañar na mesma tarde dous premios: o Xerais e o Fundación Caixa Galicia, con Sol de inverno e Ás de bolboreta, respectivamente. A autora de Ferrolterra confirmou no 2009 que é unha das escritoras de referencia da nova fornada de narradores en galego.

O outro gran premio en galego, o 'Blanco Amor', gañouno Luís Rei Núñez con Montelouro (Xerais). O pontevedrés construíu unha historia con alento clásico que é retrato da vida de moitos galegos no século XX.

Carlos G. Reigosa fíxose co 'Torrente Ballester' 2008 cunha novela que viu a luz neste ano, A vida do outro (Xerais). Este premio confirma a traxectoria do xornalista, en ascenso continuo desde hai case 30 anos.

O premio 'Lueiro Rei' do 2009 foi para Areaquente (Sotelo Blanco), de An Alfaya. A escritora viguesa demostra ser unha das voces máis firmes do panorama literario galego, cunha gran regularidade editorial.

Manuel Rivas entrou no 2009 na Real Academia Galega. O ano que remata foi para el o da súa consolidación como voz preferente no xornalismo literario, na análise da realidade galega. Recente nos andeis está o seu Episodios galegos (Xerais).

Volveu escribir despois de varios anos Xelís de Toro. O seu Riofero (Xerais) é unha novela de aventuras cunha localización ambigua e unha traxedia oculta.

O gran supervendas galego do 2009 na ficción foi Domingos Villar. A volta do detective Leo Caldas en A praia dos afogados (Galaxia). A acción desenvólvese desta volta en Nigrán e mantén os mesmos vimbios que fascinan os seus lectores.

Outro autor con selo de éxito entre os lectores é Jaureguizar. O lucense conta por goles todos os títulos que publica: O contador de estrelas (Alfaguara Obradoiro) esgotouse nas librarías.

María Reimóndez levounos no 2009 de paseo polas Antillas. Pirata (Xerais) foi unha das revelacións do ano e obriga a crítica e os lectores a estaren atentos ás evolucións da súa narrativa.

E por último, poesía. Secesión (Galaxia) é a porta de entrada ao universo de Chus Pato, unha das voces máis orixinais e máis firmes das letras galegas.