Parque Eólico de Cabo Vilán, feito por Fenosa nos gobernos de Manuel Fraga

Os xuíces aceptan o recurso de varias das adxudicatarias do reparto do bipartito, que recorreran un auto previo que paralizaba cautelarmente esas adxudicacións.

A paralización cautelar, agora sen efecto, foi solicitada por MUVEGA, sociedade na que participa o vicepresidente de La Voz de Galicia, José María Castellano, e que non recibiu megawatios do bipartito.

 Feixóo ten que asumir toda a responsabilidade da derrogación

A nivel práctico o novo auto ten consecuencias limitadas, polo menos inmediatamente. O PP aprobou en solitario esta semana unha nova Lei Eólica. Esta norma deixa sen efecto o reparto do bipartito. Contra a nova Lei Eólica só se pode recurrir ante o Tribunal Constitucional, como xa está planeando a patronal eólica galega, contrariada polo novo canon ambiental aprobado polos conservadores.

As consecuencias son máis importantes a nivel político. O presidente da Xunta xa non pode presumir que a Xustiza declarou ilegal o reparto eólico do Bloque. Alberte Nuñez Feixóo ten que asumir en solitario a responsabilidade de parar un concurso sen causas legais, coas evidentes perdas de emprego e de inversións no sector que xa se están a producir.

A batalla político-xudicial no país favorece a outras autonomías

Ademais, o auto é un argumento máis para as adxudicatarias co anterior Goberno. É probábel que estas empresas sigan coa liorta xudicial até lograr indemnizacións da Xunta. O BNG xa advertiu no Parlamento que a derrogación situación a varias das adxudicatarias preto da desaparición.

A consellaría de Economía xa apuntou que o canon podería servir para pagar esas hipotéticas indemnizacións, malia que o conselleiro Xavier Guerra indicara nun principio que a derrogación eólica faríase de tal xeito que a Xunta non tería que compensar a ninguén.

Trátase, en todo caso, dun novo chanzo dunha batalla xudicial que pode prolongarse varios anos e que ameaza con atrasar aínda máis novas concesións de parques. Un atraso que lastraría o futuro do sector no país; pois as primas estatais a enerxía eólica vanse reducir. Isto xa está a provocar que as concesionarias noutras autonomías se adianten no reparto de subvencións ás compañías que teñen planes para investir en Galiza.