O presidente de Iberdrola abraza a Feixóo no acto do PP tras a investidura. Iberdrola

Cómpre ter en conta que unha das claves do negocio eólico son as primas. Os muíños son rendíbeis porque o Estado subvenciona parcialmente os megawatios do vento.

Os parques que funcionen primeiro terán máis subvención

Con todo, o Ministerio de Industria creou o ano pasado un cupo máximo de megawatios que poden ser subvencionados. As operadoras que teñen antes as máquinas en funcionamento poden solicitar primeiro a Madrid as primas, que o Estado vai ir reducindo.

Por iso para as eléctricas fan todo o posíbel por montar canto antes os parques. Polo mesmo motivo, o anterior Goberno galego limitou o ritmo das autorizacións dos muíños aprobados na época Fraga, dos cales o 90 por cento está en mans de empresas foráneas. O bipartito tentaba así contribuír a que as empresas que gañaran o novo concurso eólico, que finalmente derrubou o PPdeG, tivesen máis doado o acceso ás primas estatais.

Tras a chegada dos conservadores ao poder cambiou a política da Xunta. Alberte Núñez Feixóo presume de que o novo Executivo acelerou ao máximo as centrais en trámite. Un dos resultados é que a eléctrica española Iberdrola conseguiu avanzar na construción de, polo menos, 14,55 megawatios.

Parque en Nogueira eximido de avaliación ambiental

O primeiro parque trátase da ampliación do Parque eólico de Sil Fase II en Nogueira de Ramuín, que levaba cos trámites parados dende 2007. O DOG do 18 de novembro aproba a súa execución cunha potencia de 12 megawatios.

O seu titular é Iberdrola Energías Renovables, cun orzamento de máis de nove millóns. En novembro deste ano a Xunta eximiu o parque do trámite de avaliación ambiental estratéxica.

Iberdorla xestiona os aeroxeradores dun concello do PP

O máis recente dun parque eólico singular en Nogueira de Ramuín. O titular da instalación é o Concello, gobernado polo PP, do que Iberdrola actúa como concesionario.

Para este parque solicítase a declaración de utilidade pública para poder ocupar os montes de man común do lugar de Rebordondo. A central ten só dous aeroxeradores e 2.55 megawatios de potencia, segundo o publicado no DOG o 15 de decembro.