Protesta antitaurina en Galiza. Xosé Marra

Os grupos de PSC, PP e Cidadáns presentaron unha emenda á totalidade contra esta iniciativa para evitar que prospere, aínda que os propios socialistas e CIU lle darán liberdade de voto aos seus deputados, dada a disparidade de opinións que xera este tema nas súas filas.

Tal e como recolle El Economista, a ILP antitaurina ten grandes opcións de prosperar e empezar así a súa tramitación ata converterse nunha lei que prohiba as touradas en Catalunya.

Barcelona, símbolo antitaurino

O 6 de abril do 2004, Barcelona converteuse no primeiro municipio do Estado español en proclamarse cidade antitaurina, a través dunha declaración institucional aprobada no concello.

Os promotores da ILP están agrupados na plataforma Prou! (¡Basta!), que fixo público un documento que cita o apoio de personalidades como o filósofo Salvador Paniker, o científico Jorge Wagensberg, as actrices Silvia Marsó e Marisol Galdón, o xornalista Francisco González Ledesma, a escritora Espido Freire, o cineasta Juanma Bajo Ulloa ou o debuxante Forges.

En defensa das touradas

O director da Plataforma en Defensa da Festa, Luis Corrales, multiplicou estas semanas as súas xestións cos deputados "para transmitirlles a mensaxe de respecto á liberdade e á tradición democrática".

A Plataforma en Defensa da Festa presentou o seu "Manifesto pola liberdade", asinado por personaxes famosos como o escritor Pere Gimferrer, a xornalista Mercés Milà, o pintor Miquel Barceló, o actor Josep Maria Pou ou o cantante Kiko Veleno.

As claves da votación

Actualmente, a repartición de forzas no Parlamento catalán estrutúrase da seguinte forma: CIU ten 48 deputados; PSC, 37; ERC, 21; PPC, 14 deputados; ICV-EUiA, 12; e o grupo mixto, 3.

Os grupos que a priori votarán máis homoxeneamente contra a ILP son o mixto e o PP, mentres que ICV-EUiA e ERC significáronse polo seu apoio á iniciativa, de maneira que os 48 votos de CIU e os 37 do PSC acabarán decantando a balanza cara a un lado ou outro.