Cartaz na Facultade de Psicoloxía dunha das xornadas organizadas pola Centro Nacional de Educación Sexual (CENESEX), conxuntamente coa Unión de Jóvenes Comunistas, a Federación Estudiantil Universitaria e a Casa Estudiantil Universitaria. Xesús Vaamonde    1 / 2    

O organismo da Educación Sexual en Cuba vén de denunciar os ataques de diversas organizacións que acusan a illa de emprender unha campaña contra a homosexualidade. A asociación española Colegas emitira un comunicado no que falaba do suposto arresto de seis homosexuais cubanos e ofrecía cifras semellantes dos anos 2008 e 2009. O CENESEX desvinculou as detencións á condición sexual das persoas.

Ademais, a institución dirixida pola especialista Mariela Castro –filla de Fidel Castro– lembra outras campañas da asociación española contra o CENESEX, como a organización dunha marcha polo Orgullo Gai en La Habana como contraacto á Xornada Cubana contra a Homofobia –apoiada por institucións oficiais e ONG da illa. “Recibiron apoio loxístico e financeiro da Unity Coalition of Florida a sete organizacións LGBT (lesbianas-gais-bisexuais e transexuais) que foron creadas ao efecto”. O CENESEX sinala que “houbo máis xornalistas” para cubrir o acto “que asistentes”.

Descrédito sistemático

A asociación madrileña Colegas ten organizado con fondos da Comunidade de Madrid e co apoio do PP, xornadas nas que se cuestiona o respecto á homosexualidade na illa.

O CENESEX denuncia o descrédito sistemático que sofre Cuba e rexeita “categoricamente” os ataques de asociacións como Colegas, “que son mostras da arrogancia, da falta de respecto, do odio e do enfoque politizado co que se pretende manipular a realidade das persoas LGBT en Cuba”. “Ás e aos transexuais cubanos que por delitos comúns cumpriron sentenzas, garantíuselles a atención de balde polos nosos especialistas nas prisións”, explica o centro.