Reportaxe sobre a caza do Rapoxo. X:B./R.R.

Un problema de sensibilidades entre cazadores e ecoloxistas pero non de legalidades. A Consellaría de Medio Ambiente situouse á marxe da polémica xerada en torno á caza do raposo en Galiza, tras a tensa xornada vivida o domingo en Portomarín con motivo do Campionato de Caza de España, que acabou cun ecoloxista detido e a presentación de denuncias contra algúns cazadores por agresións.

Dende Medio Ambiente sinalaron que na consellaría non teñen ningún informe sobre a poboación de raposos, xa que non se trata dunha especie de especial protección nin en perigo de extinción. Así, deron autorización para o campionato porque cumpría todos os requisitos legais.

“A caza está autorizada, mentres cumpran os requisitos como ter licenza, usar as armas regulamentarias e cazar nos terreos habilitados e con permiso”, sinalan dende Medio Ambiente.

A cifra oficial: 69 raposos mortos

A xornada do domingo reviviu a experimentada o ano anterior no Carballiño, con malas novas para a poboación de raposos porque o número de exemplares mortos aumentou (69 fronte aos 63 da anterior edición, segundo as cifras oficiais). Dende “Matar por matar non” critican a falta de diálogo da Federación de Caza xa que “non lles interesa o debate público”, mentres a directiva desta defende que se trata dunha “práctica legal”.

"Dez matarifes armados fronte a catro rapaces"

Dende as organizacións opositoras á caza do raposo resaltan que os datos de Medio Ambiente están falseados, e resaltan, na crónica da xornada que"agora a novidade é que dez matarifes armados teñen que chamar á Garda Civil para que os defenda de catro rapaces, case nenos, que van tras eles tocando un chifre".