Ricardo Cabanas. Ruben Sprich/REUTERS

Con xeitos de crack marcou Diego Castro o gol do Spórting de Xixón en Tenerife. Malia todo, o equipo do galego perdeu 2-1. Na porta contraria, Aragoneses non puido facer nada para evitar o gran tanto.

Diego López foi titular polo Vilarreal na vitoria castellonense ante o Getafe (3-2). No mesmo equipo xogou o vigués Pereira, que entrou no campo no minuto 76.

O ourensán do Valladolid Borja foi expulsado no empate dos casteláns en Sevilla (1-1). No seu equipo tamén foi titular o eumés Antonio Barragán.

Alexandre Bergantiños foi titular polo Xerez na derrota andaluza na casa diante do Atlético de Madrid (0-2).

Xulio Álvarez fixo un mal partido co seu Mallorca, tendo en conta o bo partido balear diante do Zaragoza (4-1). Foi substituído no minuto 65.

Paulo Álvarez entrou no Deportivo no minuto 88, cando os coruñeses xa perdían 1-3 ante o Barcelona.

Segunda división

O Celta voltou ser o equipo con máis galegos en xogo. E na vitoria en Girona (1-2) tiveron moito que dicir. Iago Aspas fixo o primeiro gol vigués de penalti e foi dos mellores do partido. Hugo Mallo volveu ser substituído no primeiro tempo por gañar unha temperá tarxeta amarela que ben puido ser vermella. O de Marín é un xogador tan eficaz que ás veces abusa da agresividade. Noguerol volveu ser titular tras varias xornadas no banco. Lago afiánzase no equipo galego, igual que Joselu, que volveu ser titular no ataque vigués. No minuto 86 entrou Toni Rodríguez.

Neste mesmo partido xogou Dani Mallo. O coruñés foi suplente pero entrou tras a expulsión do porteiro titular Jorquera. Estando na porta encaixou o segundo gol céltico, de Botelho.

Dani Carril foi titular no Levante na igualada dos valencianos na casa fronte ao Recreativo de Huelva (1-1).

Nano foi titular no Numancia na vitoria dos sorianos na casa fronte ao até onte líder da segunda, o Cartagena de Rubén (2-1), que non xogou ese partido.

Outras ligas

Ricardo Cabanas foi titular co Grasshopper e marcou o único gol do duelo ante o Zurich (1-0).

Carlos Varela estivo no once inicial do Neuchatel Xamax na derrota en Berna perante o Young Boys (1-0).

Nacho Novo tamén foi titular no Glasgow Rangers, tras a polémica da semana pasada. O ferrolán non marcou na vitoria fronte ao Falkirk (1-3) e acabou substituído no minuto 62.

Paulo Couñago foi suplente no Ipswich Town no empate na casa do Bristol City (0-0). Entrou no minuto 55.

Gonzalo García entrou no minuto 74 na derrota do Groningen na casa do Feyenoord (3-1).