Ambos aseguraron que fixeron "todo o humanamente posible", tendo en conta as condicións meteorolóxicas que se rexistraban.Deste xeito, responderon as acusacións efectuadas polo sindicato nacionalista CIG que demanda a actuación da Fiscalía ao considerar que non se cumpriron os protocolos internacionais de rescate.

   "Dadas as condicións do tempo que había en aquel momento fixeron todo o humanamente posible", asegurou Martín Rosales, a interpretación da xestión do naufraxio realizado polos efectivos de Salvamento da cal foi compartida por Carmen Gallego, quen mesmo asegurou que "en moitos casos" actuaron ao "límite do risco" para as súas vidas.

   En todo caso, ambos os dous tamén coincidiron en que se queda "algunha dúbida" existen autoridades "competentes" que están a investigar o naufraxio aos que "cidadáns ou centrais sindicais" poden acudir "para clarificalas", emprazou Martín Rosales, quen defendeu que "teñen toda a liberdade do mundo para mostrar a súa conformidade ou non cos dispositivos".

Declaración do armador 

   Martín Rosales fixo esta defensa dos efectivos de Salvamento Marítimo despois de tomar declaración na Capitanía Marítima de Vilagarcía ao armador do 'Cordero', José María Santiago, quen acudiu ás dez da mañá, acompañado do seu irmán Juan Manuel Santiago, quen tamén testificou porque participa na sociedade armadora.

   Ambos saíron dúas horas máis tarde sen facer ningún tipo de comentario aos medios de comunicación que os esperaban aínda que se prevía que o armador defendese ante o capitán marítimo a hipótese pola que se decantou dende que sucedeu o naufraxio e que atribúe o afundimento do 'Cordero' ao "impacto" contra algo -- "un colector ou madeiro" --, descartando así un golpe de mar, xa que dende un principio mantivo que non había temporal na zona no momento do sinistro.

O patrón, afectado

   Finalmente, tampouco hoxe acudiu a declarar, como estaba previsto, o patrón maior do arrastreiro, Marcos Antonio Ures García, un dos tres superviventes do naufraxio, no que faleceu unha persoa e outras catro permanecen desaparecidas.

   "Está moi afectado psicoloxicamente e cada vez que se lle pregunta polo tema (naufraxio) ponse a chorar", trasladou o capitán marítimo de Vilagarcía aos medios de comunicación para xustificar a ausencia do patrón maior, quen por este motivo tampouco puido testificar o pasado luns xunto aos seus dous compañeiros e únicos, xunto a el, superviventes, José Manuel Parada Argibay e Hendra Ernawan.