Un momento do 'Telexornal serán' na TVG. TVG

O portavoz da Oficina Nacional de Transición á Televisión Dixital Terrestre (TDT) do Ministerio de Industria, Ignacio León, confirmou que a normativa permite que o sinal da Televisión de Galicia (TVG) entre no territorio limítrofe da comarca leonesa do Bierzo.

Ignacio León manifestou onte, en rolda de prensa en Ponferrada, que "tivemos hai pouco a consulta oficial por parte da Xunta acerca desta cuestión".

A resposta a esta consulta foi que "o Ministerio permite este tipo de solucións e, de feito, estanse dando xa en numerosas comunidades autónomas".

León precisou que "a única condición que pon é que haxa un convenio entre as dúas administracións autonómicas vinculadas e que sexa un convenio de forma que haxa un intercambio", de tal modo que nas dúas comunidades implicadas no acordo se poidan ver os sinais das súas respectivas televisións autonómicas.

O portavoz da Oficina Nacional de Transición á TDT recalcou que "o Ministerio simplemente dá esta cobertura, esta posibilidade permítea e xa está en mans das dúas administracións autonómicas a negociación, o estudo deste convenio".

O subdelegado do Goberno en León, Francisco Álvarez, expresou o seu respaldo a que se produza un acordo entre Galicia e Castela e León neste sentido.

"O Bierzo está vinculado culturalmente a Galiza"

Álvarez explicou que "O Bierzo está vinculado culturalmente a Galiza, ten o mesmo substrato cultural en boa medida", e considerou que a permanencia do sinal da TVG é "unha necesidade" para esta comarca.

Até agora, os cidadáns do Bierzo e doutros territorios limítrofes de Castela e León, como Sanabria en Zamora, reciben o sinal analóxico da TVG, pero co apagamento analóxico quedarán sen a posibilidade de seguir esta canle.

Televisión Castela e León conta actualmente con dúas canles, que se emiten tanto en analóxico como en dixital.