Rolda de prensa de Causa Galiza na Gentalha do Pichel en Santiago. Manuel Vilas Causa Galiza, plataforma que artella a gran parte do independentismo do país, organiza unha manifestación o próximo domingo. Será a partir das 12 na Alameda de Santiago para denunciar “o carácter antidemocrático da Constitución Española" co lema "sobre nós, decidimos nós, soberanía e democracia". A mobilización conta co apoio da Asemblea Local da CIG en Compostela, segundo indica a web de Causa Galiza.

Braulio Amaro, voceiro da plataforma, argumentou na rolda de prensa de presentación da protesta que “o dereito de autodeterminación non é unha utopía” na Europa actual. Así, Amaro apuntou ao exemplo de Escocia, onde o goberno prepara un referendo sobre a independencia en 2010, ou á separación de Chequia e Eslovaquia, como proba de que o mapa dos estados segue a ser flexíbel.

Aplauso para os referendos cataláns

O independentistas cualificaron de “moi positiva” a organización de referendos sobre a independencia en Cataluña. Iso si, Amaro admitiu que a base social do independentismo galego é menor que a do catalán. O voceiro atacou as medidas do Estado contra as consultas, entre as que citou o frustrado intento do Plan Ibarretxe.

Tamén houbo críticas para o alcalde de Santiago. Amaro cualificou a Sánchez Bugallo (PSdeG) de “represor” por non ceder “palcos” ou “pavillóns cubertos” para a manifestación do Día da Constitución.

Con todo, outro dos voceiros de Causa Galiza, Pedro Alonso, animou aos independentistas que militan en diferentes formacións a participar para “soldar o vínculo” e “construír un polo común de defensa” destas ideas.

Xantar, vídeos e concertos

A manifestación, que Causa Galiza comunicou á Delegación do Goberno, rematará na Praza do Toural. Despois haberá un “xantar popular” na Carballeira de Santa Susana e diversas actividades lúdicas, como proxección de obras de Gzvídeos.

Xa pola noite, haberá un concerto no que actuarán, entre outros, Mini e Mero, O Leo e Ataque Escampe.