Anxo Quintana, deputado do BNG. Pepe Ferrín / AGN

"Este partido ou o gaña Galiza ou o perde Galiza", sentenza Quintana nunha carta aberta publicada en varias cabeceiras de tirada autonómica, na que lle reclama a Núñez Feixóo, "polo menos, un pronunciamento rotundo en dous aspectos que, con tanta prórroga, cada día se fan máis urxentes" a xuízo do nacionalista.

En primeiro lugar, require do presidente da Xunta que diga "con claridade e contundencia" que a posíbel fusión de Caixa Galicia e Caixanova "non será unha absorción dunha por outra", despois dunha semana na que mantivo unha rolda de contactos cos presidentes de ambas as dúas entidades, cos líderes das formacións políticas, os sindicatos e as asociacións de empresarios de Galiza.

Ademais, a decisión que finalmente se adopte debe significar "unha estación final e non un apeadeiro de empalme para enganchar todo o tren financeiro do país a unha locomotora foránea", explica Quintana.

En referencia a este mesmo punto, o tamén presidente do Instituto Galego de Estudos Europeos e Autonómicos alude ás discrepancias entre o PP galego e "a dirección española do partido". "Vostedes dedícanse tamén a articular fusións e absorcións", recrimina, matizando que o fai "coa desconfianza propia de galego".

"Para Galiza e dende Galiza"

Un segundo punto fundamental para o deputado do BNG é que Feixóo comprometa que utilizará as prerrogativas legais que ten "e as que o Parlamento galego está disposto a outorgarlle" para que, ao final deste proceso, quede asegurado que, "polo menos, Galiza contará con algunha caixa, máis grande ou máis pequena, pero con domicilio social e fiscal, centro de decisión e obra social en Galiza". "Para Galiza e dende Galiza", incide.

Ao respecto, fai referencia á acción da formación frontista neste tema na Cámara galega, que cualifica de "máis leal imposíbel", ao "facer coincidir no tempo unha proposta aprobada polo pleno para modificar a lei de caixas". Entre outras cousas, subliña que a reforma lle dará "máis poder sobre elas".