Alberte Núñez Feixóo e Alfonso Rueda con responsábeis da Confederación de Empresarios de Galiza. AGN O presidente da Confederación de Empresarios de Galicia (CEG), Antonio Fontenla, sinalou que esperará a coñecer os datos que o presidente da Xunta lles expoña na reunión de hoxe para dar a súa opinión, aínda que manifestou en diversas ocasións que, a título persoal, prefire que as dúas caixas se manteñan por separado.

Fontenla adiantou, no entanto, que o máximo mandatario galego contará co apoio da patronal na determinación que tome, despois de que espera que a decisión estea baseada en datos e en criterios firmes.

A Confederación de Empresarios de Pontevedra (CEP), polo seu lado, manifestou abertamente o seu rexeitamento a unha posíbel fusión entre Caixanova e Caixa Galicia e xustificou a súa postura cun informe, presentado xunto coa Cámara de Comercio de Vigo –o seu presidente, Xosé García Costas, forma parte do consello de administración de Caixanova– que di que a citada fusión "non achega nada" en termos de solvencia ou eficiencia.

O ideal, dúas caixas

Pola súa banda, o presidente da Confederación de Empresarios de Ourense, Francisco Rodríguez, explicou que enfronta o encontro disposto a escoitar o presidente e analizar os diferentes escenarios que se expón. "O ideal é que queden dúas caixas que sexan eficaces e que compitan entre elas", defendeu, pero "iso non vai se é posíbel".

Nese caso, "irase ao seguinte", que é unha fusión entre as entidades galegas e, se esa alternativa tampouco frutifica, "irase ao seguinte", que é estudar un SIP ou outras operacións con caixas foráneas, apuntou.

SIP reversíbel

Respecto ao SIP, Rodríguez considerou que primeiro "hai que saber se efectivamente é reversíbel", en alusión á opción exposta por Caixanova de aliarse temporalmente con outras entidades, pero evitando unha fusión, que é o fin desta fórmula a medio prazo. "Hai que ver se na práctica pode ser así, cando un socio se vai converter en líder da operación", dixo.

O representante dos empresarios ourensáns indicou que valora que Feixóo queira escoitar a súa opinión e asegurou que, a pesar de todo, a patronal acode ao encontro "sen apriorismos". A condición é, para Rodríguez, a "viabilidade" e a ela condiciona calquera proxecto. "Sería unha traxedia que, nun momento de problemas de liquidez, se nos retire o acceso ao crédito", advertiu.

Esta reunión producirase tras os encontros do martes, cos dirixentes das caixas, e de onte, cos responsábeis de PSdeG e BNG. Feixóo deulles un prazo dunha semana ás dúas entidades, que expira o vindeiro martes, para que busquen unha estratexia "común" e emprazou os partidos da oposición a unha nova entrevista, unha vez terminen os traballos de Caixa Galicia e Caixanova coa Consellaría de Facenda, para situarse "de forma conxunta".