Alberte Núñez Feixóo, en rolda de prensa. AGN
Así o confirmou Feixóo na rolda de prensa, na que interviñeron os tres dirixentes, posterior á reunión de máis de dúas horas e media que mantiveron para abordar se o futuro das dúas entidades financeiras debe pasar pola súa fusión. As forzas da oposición concordan coa Xunta en que as dúas condicións para as operacións que propoñan as caixas son "solvencia e galeguidade; galeguidade e solvencia", dixo o máximo mandatario galego.

Con estes dous requisitos "o marco, como é natural, estréitase moito", recoñeceu e expuxo que o Goberno galego e PSdeG e BNG avanzan polo "mesmo camiño", en relación a estas dúas condicións. No contexto actual debe seguirse unha "estratexia de país", agregou Feixóo, quen reclamou que isto sexa unha prioridade para "todas as institucións". "E cando digo institucións, digo caixas", resolveu.

O BNG, a prol da fusión

Unicamente o portavoz nacional do BNG explicitou a súa postura a favor da fusión de Caixa Galicia e Caixanova; mentres que Manuel Vázquez se limitou a afirmar que o PSdeG aposta por que as caixas "teñan os seus centros de decisión en Galiza" e que as decisións que se tomen "redunden nas súas fortalezas".

O máximo mandatario galego concretou que, unha vez terminados os traballos técnicos, convocará en "24 horas" os dous responsábeis das formacións da oposición. A postura, espera, será coincidente "se non ao cento por cento, ao 99 por cento".

O responsábel dos socialistas indicou que será tras esa segunda reunión, cando o Goberno galego dea a súa postura definitiva, o momento no que o seu partido fará pública a súa opinión, mentres que o representante dos nacionalistas declarou que apoiará "calquera posición que signifique que Galiza queda coas caixas".