O portavoz do Grupo parlamentario do PPdeG, Manuel Ruíz Rivas. Pepe Ferrín/AGN

A sesión da tarde na Cámara galega concluíu sen ningún acordo entre os grupos, tras a unanimidade alcanzada pola mañá para iniciar o trámite dunha proposición de lei dirixida a reformar a normativa vixente en materia de caixas de aforro, que presentou o BNG.

O PPdeG rexeitou a moción formulada polo BNG, que contou co apoio dos socialistas, na que pedía  coñecer a planificación e as medidas que adoptará a Xunta en materia de violencia de xénero.

Os conservadores decidiron non referendala tras a negativa da defensora da moción, a deputada nacionalista Ana Pontón, a incorporar a emenda da parlamentaria Paula Prado encamiñada a "pedir que se axilice o que o bipartito non fixo en 21 meses", é dicir, as medidas contidas na Lei para a prevención e o tratamento integral da violencia de xénero.

Hospital de Pontevedra

Este escenario repetiuse no debate sobre a construción dun novo hospital en Pontevedra, cando os socialistas lle demandaron á Xunta que rectificase e volvese á edificación desta instalación en forma de ampliación do actual complexo de Montecelo.

Durante o debate, o deputado 'popular' Miguel Santalices fixo fincapé en que o PSdeG pretendía votar "unha moción en contra da construción dun hospital en Pontevedra", e considera "inxusto" non levantar un novo na cidade. O parlamentario defendeu que esta iniciativa vai en contra dos intereses dos pontevedreses.

Fronte ao exposto, o titular da moción, Modesto Pose, alertou de que o PPdeG o que pretende é "darlle o gusto a Telmo Martín" (voceiro do PP na cidade). Ademais, entendeu que se a decisión de agora é a correcta, a actual conselleira de Sanidade, Piar Farjas, debería dimitir por pertencer ao departamento deste área na época de Hernández Cochón que falou de que sería unha "dilapidación" optar por un novo edificio en lugar de amplialo.

Pola súa banda, a deputada nacionalista Ana Luísa Bouza lembrou que reclamou polo artigo 9 do Regulamento do Parlamento o informe de Gesmédica sobre o plan funcional do hospital, no que baseou a conselleira de Sanidade a súa argumentación durante a interpretación do anterior pleno a este respecto (e da que se deriva esta moción). "Pensaba que o faría de oficio", lamentou a deputada.