Xosé Luís Méndez e Xulio Fernández Gaioso. Pepe Ferrín / AGN

Fontes de Caixa Galicia expuxeronlle a Europa Press a súa satisfacción pola decisión da Xunta, como "regulador" das caixas, de buscar unha negociación das dúas entidades galegas para decidir "se se pode facer un bo proxecto de fusión e facelo o antes posíbel, ou abrir outras vías cun plan B". Así, estas fontes indicaron que á vista dos datos técnicos habería que decidir se a fusión "sería viábel", pero puntualizaron que se ao final non se chega a un proxecto conxunto, abrirá "outra vía canto antes".

Pola súa banda, fontes de Caixanova limitáronse a transmitir que a entidade con sede en Vigo está aberta a "estudar a proposta da Xunta e despois expoñer a súa valoración", pero recordaron que o seu presidente, Xulio Fernández Gaioso, "xa presentou hai semanas a súa proposta" -na que rexeitou a vía da fusión con Caixa Galicia- e que polo momento se mantén "na mesma liña".

Mentres Caixanova evitou pronunciarse sobre o anuncio do presidente da Xunta de que impulsará "no menor prazo posíbel" a reforma da Lei de Caixas para "reforzar os labores de protectorado" sobre as caixas, as fontes de Caixa Galicia consultadas aplaudiron esta iniciativa e amosáronse abertas a que a Xunta reforce a súa representación no seu consello de administración. "É adecuado reformar a lei para adaptala aos novos tempos e estamos a favor de todo o que sexa aumentar os controis, a profesionalización e a mellora da transparencia", apuntaron.

En calquera caso, tanto fontes da Xunta como de Caixa Galicia indicaron que en virtude da vixente lexislación autonómica en materia de caixas, xa está previsto que un sistema institucional de protección (SIP) -vía formulada por Caixanova- require tamén a autorización expresa da consellaría de Facenda.

Para soster este extremo ampáranse no artigo 35.3 da lexislación vixente, no cal se sinala que "o consello de administración poderá delegar algunha ou algunhas das súas facultades de xestión nos órganos de goberno das entidades que constitúan e articulen alianzas entre caixas de aforros ou os creados ao efecto no seo da Confederación Española de Caixas de Aforros", pero apunta que estes acordos "requirirán a autorización previa" da Xunta.