Fernando Blanco, portavoz de Economía do BNG no Parlamento. AGN Blanco defendeu a proposta nacionalista como un “proxecto aberto”, para conseguir que sexa a “Lei de Caixas do conxunto de Galiza”, que permite dotar o Goberno dunha “ferramenta” para marcar o camiño e dicir por onde cómpre ir. “Nós non podemos obrigar á fusión pero si vetar calquera acordo que vaia en contra dos intereses do país”.

O deputado do BNG xustificou a presentación deste proxecto ante a falta de “dirección” e de “liderado” amosado até o de agora polo presidente da Xunta para marcar ese escenario e regras de xogo,“aquí chegouse tarde, como no debate do financiamento, e por iso tivemos que tomar a iniciativa outros”.

O parlamentar lembrou que está en xogo o tecido social, financeiro e empresarial do País, de aí a importancia deste debate malia que algúns, criticou, semella non son conscientes da súa responsabilidade histórica.

Galeguidade das caixas

Recordou tamén que o propio Parlamento, a iniciativa igualmente do BNG, manifestou hai quince días que esta lei é necesaria, votando unanimemente a favor dunha moción que compromete o Goberno a garantir que os centros de decisión destas entidades permaneza en Galiza e á redacción desta nova lei.

Para Blanco, entre os aspectos máis salientábeis do proxecto aprobado están a participación da administración galega nos Consellos de Administración, nunha porcentaxe do 20 por cento, que permita “estar presentes” e coordinar políticas para rendibilizar mellor o aforro dos galegos.

O deputado tamén se referiu á mellora da xestión das caixas, para garantir unha maior transparencia e unha maior democratización dos seus órganos de goberno, e á creación da Comisión de Retribucións e un Comité de Investimentos que realmente sexa operativo, ambos con participación da administración galega.

Segundo o parlamentar, cómpre facerlles fronte aos “intereses dalgúns” que cuestionan a propia existencia das caixas e están tentando abrir o camiño para que a longo prazo os bancos se convertan nos seus propietarios. “Este é outro dos riscos aos que nos enfrontamos, non só que perdan a súa vinculación con Galiza senón que incluso desaparezan”, de aí a necesidade de aproveitar unha oportunidade como o debate de hoxe para sacar adiante a “ferramenta” que serva para que as caixas sigan sendo galegas.