O conselleiro de Industria, Xavier Guerra. Dalia/AGN

A necesidade de transparencia foi un dos argumentos que esgrimiu Xavier Guerra para abrir o debate en torno a esta Lei, para a que solicitou as aportacións de todos os grupos. Tamén manifestou a oportunidade de “deixar pechado o debate da anulación do concurso eólico que se levou a efecto polo anterior goberno” e que, segundo declarou, presentaba sete grandes problemas.

Pola contra, o conselleiro indicou que o novo proxecto responde á necesidade dunha Lei integral sobre o sector eólico que “aporte a seguridade xurídica imprescindíbel para o desenvolvemento dunha actividade económica con garantías para todas as partes”. Dende o seu punto de vista, é unha lei que observa “de xeito escrupuloso” a liberdade de empresa e a liberalización do sector enerxético, desbotando calquera tipo de participación pública, o que estima vulneraría o ordenamento xurídico actual.

Por outra banda, Guierra subliña que o proxecto contempla a compensación o conxunto de Galiza, e os concellos en particular, polo impacto na paisaxe e no hábitat dos territorios onde se instalen os parques eólicos, así como ás redes eléctricas de evacuación. Neste sentido, a lei formula a creación dun canon e un Fondo de Compensación Ambiental, a través do que se distribuirán os fondos recadados, que permitirán desenvolver actuacións de conservación e restauración do medio ambiente.

O titular de Economía e Industria sinalou que o feito impoñíbel do canon será a xeración de  impactos visuais e ambientais adversos sobre o medio natural e a base impoñíbel virá determinada polo número de aeroxeradores existentes en cada parque, estabelecéndose un baremo polo que se define a cota, gravando máis por unidade aqueles parques cun maior número de muíños.

Asemade, o proxecto de Lei contempla "medidas que garantan o cumprimento dos proxectos industriais presentados polas empresas". Entre elas, Guerra salientou o estabelecemento dunha fianza que non se devolverá até que eses proxectos asociados non estean rematados, condición indispensábel tamén para poder vender as instalacións.

Rede Natura

O Conselleiro asegurou tamén que a Lei “non permitirá baixo ningún concepto a implantación de parques eólicos na Rede Natura actual nin na súa ampliación, así coma que no procedemento administrativo de autorización non se prescindira en ningún caso da declaración de impacto ambiental”.

Finalmente, subliña que fronte ao concurso anterior, estabelécese un procedemento administrativo de selección de anteproxectos absolutamente transparente, seguido dun procedemento administrativo de autorización caracterizado pola axilidade na tramitación.