Fernando Blanco no Parlamento O portavoz de Economía do BNG, Fernando Blanco, asegurou que “co Decreto Eólico do Goberno Bipartito púñase por primeira vez a enerxía ao servizo de Galiza, mentres que coa nova Lei Eólica do Goberno do PP volvemos á espoliación dos nosos recursos, sen contrapartidas para Galiza”.

Fernando Blanco subliñou que co decreto eólico do bipartito “garantíase o retorno de riqueza para o país; respectábase o medio ambiente e garantíase a seguridade xurídica”. “Ningún destes requisitos os cumpre agora a nova norma do Goberno de Feixóo, e por iso se queren protexer a través dunha lei”.

Así, o deputado do BNG defendeu a participación pública que se contemplaba no anterior decreto eólico, “algo fundamental para xerar beneficios públicos, e porque en calquera país é necesaria nun sector estratéxico como é a enerxía, tal e como xa fixera a Xunta de Galiza en Reganosa e noutras empresas”.

Menos protección medio ambiental

Ademais, Fernando Blanco lembrou que o decreto eólico “tiña como obxectivo poñer a enerxía ao servizo do desenvolvemento industrial do país e abrir o mercado da enerxía ás empresas galegas a través dun proceso de competencia e selección”.

Neste sentido, denunciou que “se rompeu co couto pechado das grandes eléctricas que espoliaban os nosos recursos, pero pagaban impostos e xeraban riqueza fóra no noso país, un modelo que implantou o Goberno do PP nos 16 anos anteriores e ao que vostedes queren volver”.

Por outra parte, o deputado do BNG denunciou que coa nova lei eólica do Goberno de Feixóo “pérdense garantías medio ambientais, porque non exclúen os espazos da Rede Natura e non prevén a obriga de que todos os parques eólicos teñan que ser sometidos á avaliación de impacto ambiental”.